Suliffeqarfik Polar Salmon Hjerting Laks, qallunaat suliffeqarfissuannut Polar Seafood Denmarkimut ilaatigut kalaallinit pigineqartumut ilaasoq, isumannaallisaanermik sukaterivoq.
Kapisillit taakku tunisassiaat listeriaqartut paasinarsimmat sukaterisoqarpoq. Inuit 27-t listeriamik tunillatsissimasut paasineqarpoq, taakkulu ilaat sisamat tunillanneqarsimanertik paasineraniit ullut 30-t qaangiuttut toqupput.
Suliffeqarfik Polar Salmon Hjerting Laks, qallunaat suliffeqarfissuannut Polar Seafood Denmarkimut ilaatigut kalaallinit pigineqartumut ilaasoq, isumannaallisaanermik sukaterivoq.
Kapisillit taakku tunisassiaat listeriaqartut paasinarsimmat sukaterisoqarpoq. Inuit 27-t listeriamik tunillatsissimasut paasineqarpoq, taakkulu ilaat sisamat tunillanneqarsimanertik paasineraniit ullut 30-t qaangiuttut toqupput.
Danmarkimi tusagassiuutit arlallit Statens Serum Institutip misissuisimanera ippassaq saqqummiuppaat. Misissuinermi Polar Salmon Hjerting Laks Esbjergimiittoq listeria pissutigalugu 2018-imiit 2024-mut 27-nik napparsimalernermut sisamanillu toqunerannik kinguneqartumik attuumassuteqartinneqartoq paasineqarpoq.
Tamanna Polar Seafood Denmarkip ullumi tusagassiuutinut nalunaarummi nassuerutigaa.
Politiinut unnerluutigineqartut
Polar Salmon Hjerting Laks ukioq manna januaarimi Inuussutissalerinermut Aqutsisoqarfimmit Danmarkimiittumit politiinut nalunaarutigineqareersorlu Statens Serum Institutip misissuinera tamanut saqqummiunneqarpoq. Piffissami 2023-2024-mi suliffeqarfiup tunisassiaani arlalinni listeriamik nassaartoqarsimasoq paasineqarmat suliffeqarfik politiinut unnerluutigineqarpoq. Suliffeqarfik nassaartoqarneranik paasisaqareeraluarluni iliuuseqarsimanngitsoq Inuussutissalerinermut Aqutsisoqarfiup tikkuarpaa.
Polar Seafood Denmark Hjerting Laksimi piginneqataassutinik 2016-imi pisivoq, suliffeqarfillu Polar Salmon Hjerting Laksimik taaguuteqalerpoq.
- Aqutsisuusimasut tamakkiisumik tatigineqarsimapput. Polar Seafoodip ajoraluartumik kingorna paasivaa suliffeqarfiup pitsaassutsimik nakkutilliinerata naammanngitsoq ilungersunartunik kinguneqartumik, Polar Seafood Denmark tusagassiuutinut nalunaarummi allappoq.
Tupaallaatigineqartoq
- Polar Salmon Hjerting Laksip qanoq pitsaassutsimik nakkutilliinermik pimoorussinnginnera Polar Seafoodimi tupaallaatigaarput. Tamanna pimoorullugu iliuuseqarfigissavarput, Polar Seafood Denmarkimi pisortaaneq Henrik Leth oqarpoq.
Eqqaaneqareersutut suliffeqarfiup 2023-miit 2024-mut tunisassiaani arlalinni listeriamik nassaartoqarmat Polar Salmon Hjerting Laks januaarimi 2025-mi Inuussutissalerinermik Aqutsisoqarfimmit Danmarkimiittumit politiinut nalunaarutigineqareermat Statens Serum Institutip misissuinera saqqummiunneqarpoq.
- Polar Seafoodip 2016-imi Hjerting Laksimik piginneqataalernerani Polar Salmon Hjerting Laksimik taaguuteqalerpoq, taamanikkut aqutsisut tatigilluinnalerpavut.
- Taamanimiilli ajoraluartumik paasisimavarput suliffeqarfiup pitsaassutsimik nakkutilliinerata naammanngitsoq. Taamaattumik aqutsisunik nutaanik atorfinitsitsereersugut Inuussutissanik Aqutsisoqarfiup politiinut unnerluutiginnippoq, Henrik Leth oqarpoq.
Aqutsisut nutaanik taarserneqartut
Polar Salmon Hjerting Laksimi pisortaaneq naapertorlugu aqutsisunngortut pitsaassutsimik nakkutilliisutut ilinniarluarsimallutillu misilittagaqarluarput. Taakku ingerlaannaq Polar Salmon Hjerting Laksimi suliat suleriaatsillu tamaasa misissoqqissaarsimavaat.
Pisup kingunerisaanik Polar Salmon Hjerting Laksip Danmarkimi pisiniarfinnut nioqqutai tamarmik maanna listeriaqarnersut misissorneqartalerput. Nioqqutissat listeriaqanngitsut misissuinerit takutippassuk suliffeqarfiup quersuanit aatsaat anninneqarsinnaalernikuupput. Tamatuma saniatigut "isinik sisamanik" periuseq atuutsinneqalerpoq, tassani sulisut ikinnerpaamik marluk misissuinerup inernera takoqqaartussaallugu, Henrik Leth oqarpoq.
Polar Salmon Hjerting Laksimi pitsaassutsimik nakkutiginninneq sukaterneqarmalli 440-riarluni misissuisoqareerpoq, taakkunanngalu listeriamik nassaartoqarsimanani.
- Polar Salmon Hjerting Laks Polar Seafoodimut ilaavoq, tunisassiavullu pitsaanerpaajunerat qularutigineqassanngilaq. Taamaattumik suliffeqarfiup tunisassiaanik tatiginnilertoqaqqilernissaata tungaanut annertusisamik misissuisassaagut, pisortaq Henrik Leth oqarpoq.
