Esben Olsvig Jensen Danmarkimi aalisarnermut tunngasumik ilinniagaqarnini naammassigamiuk aalisartuulernissani qilanaaraa.
Sulisitsisuata, Polar Seafoodip, aamma nuannaarutigalugu sulilersippaat.
Esben Olsvig Jensen Danmarkimi aalisarnermut tunngasumik ilinniagaqarnini naammassigamiuk aalisartuulernissani qilanaaraa.
Sulisitsisuata, Polar Seafoodip, aamma nuannaarutigalugu sulilersippaat.
Polar Seafoodip kilisaataasa pisortaat Jens Jørgen Egede Aalisarnermut Piniarnermullu Nakkutilliisoqarfimmit ukioq manna januaarip arfineq-pingajuanni allagarsivoq. Polar Seafood inuttaqarnermik nalunaarummik unioqqutitsisimasutut inatsisitigut malersorneqarsinnaavoq.
Ajornartorsiut tassaavoq Esben Olsvig Jensen ukiuni tallimani aalisarnermik ilinniakkaminut atatillugu ukiuni marlunni Danmarkimiissimavoq, taamaattumillu nunanit allanit suliartortutut isigineqarluni naak inuunini tamaat Kalaallit Nunaanni najugaqarsimagaluarluni.
– Kalaallit Nunaanni imaani isumannaatsumik angallannermi allagartartaarnissannut ukiup affaa utaqqisariaqarama Danmarkimi aalisarnermik ilinniagaqarpunga. Ilinniagara naammassiniassagakku ilaquttakka nammineq timmisartumut bilitsinut Danmarkimilu najugaqarnissamut ilinniakkakka namminneq aningaasaatiminnik akiliipput. Suliffeqarfik uannut atorfinitsitsiumasoq oqartussanit sooq pillarneqassanersoq paasiuminaarppoq, Esben Olsvig Jensen oqarpoq.
Tunngaviusunut tunngassuteqartoq
Ilinniarnermut atatillugu nunani allaniittunut malittarisassat atuutinngillat. Esben Olsvig Jensenimulli atuutinngilaq, taassumami ilinniakkami ilaa nammineq akilerpaa.
Taamaattumik Polar Seafood immikkut akuersissummik qinnuteqartariaqarsimavoq. Aatsaalli Esben Olsvig Jensen umiarsuarmut ikimmat akuersissummik tunineqarpoq, tamannalu kingusinaareerpoq. Tamanna uggornarlunilu tunngviusunullu tunngasoq, kilisaatip pisortaa Jens Jørgen Egede oqarpoq.
- Angut inuusuttoq kalaaleq Danmarkimi aalisarnermik ilinniarsimanini naammassigamiuk angerlartoq atorfinitsipparput. Inatsisit maleruaqqissaarsimavagut, kisiannili maleruagassat tunngavigalugit inatsisitigut malersorneqarpugut, oqarpoq.
Malittarisassat nutaat atuutilersinneqassapput
Polar Seafoodilli akiligassiineq malittarisassat malillugit pisimanera apeqqusinngilaa. Taamaattumillu akiligassiissut 5.000 koruuniissagatinneqartoq akilissallugu. Suliaq Esben Olsvig Jensenimut kinguneqassanngilaq taannalu Polar Seafoodimi suli atorfeqarpoq.
Ikinnerusut assigusumik misigisaqarnissaat anguniarlugu maleruagassat nutarsarneqartussaapput. Inuttaqarnermut nalunaarut nutaaq juulli sioqqullugu tusarniutigineqarpoq.
Nalunaarutissamut nutaamut siunnersuut piviusunngortinneqassappat piumasaqaatit siunissami sakkukinnerulersinneqassapput. Ukiuni kingullerni tallimani Kalaallit Nunaanni najugaqarneq akileraartarnerlu ukiuni marlunni pisimassasoq piumasaqaataalissaaq.
