Politi: Angut periarfeerunneqarnikoq toqungasoq nanineqarpoq
Politiit ulluni kingullerni Kangaarsummi angummik toqungasumik ataasinngormat sissami nassaarineqartumik misissuipput. Toqungasoq kinaasuusersineqarpoq. Angutaavoq 48-nik ukiulik, juulimi 2023-mi maqaasineqartutut nalunaarutigineqartoq.
Angut toqungasoq Nuup eqqaani Kangaarsummi ataasinngornermi nassaarineqarpoq. Angut 48-nik ukiulik juulip tallimaani 2023-mi maqaasineqartoq nassaarineqarpoq.
Kalaallit Nunaanni Politiit
Kalaallit Nunaanni Politiit ulluni kingullerni angummik toqungasumik, Nuup eqqaani Kangaarsuup sissaani innuttaasunit nassaarineqartumik, misissuipput. Angummik toqungasumik nassaartoqarneranik Politiit ataasinngornermi maajip 20-ani nalunaafigineqarput, tamatumalu kingorna politiit nassaarineqartoq kinaassusersiniarlugu misissuipput.
Kalaallit Nunaanni Politiit maanna ilisimatitsissutigisinnaalerpaat angut 48-nik ukiulik juulip tallimaani 2023-mi maqaasineqartutut nalunaarutigineqartoq nassaarineqarsimasoq.
- Politiit misissuinerminni paasivaat toqungasoq sivisuumik immamiissimassasoq, taamaattumillu toqungasup kinaassusia paasiniarlugu misissuisoqangaatsiarpoq, politiit allapput.
Kigutit CT-mik tarrarsoraat
Toqungasup kinaassusia paasiniarlugu kigutai Dronning Ingridip Napparsimmavissuani CT-mik tarrarsorneqartut Kalaallit Nunaanni Politiit ilisimatitsipput. Angutip 48-nik ukiullip siorna juulip tallimaani periarfeerunneqartup kigutaasa assigigaat tarrarsuinermi paasineqarpoq.
Angut taanna juulip tallimaanni Nuummiit Maniitsumut aallarsimasoq apuuffissaminulli suli apuutinngitsoq ilaqutaasa politiit siorna nalunaarfigaat.
Politiit taamani ujaasipput, maqaasineqartoq nassaarineqarsimanngimma juulip arfineq-pingajuani unitsinneqarpoq.
- Angutip toqunera pasinartumik aallaaveqarneranik takussutissaqanngitsoq Politiit misissuinerisa takutippaat, Politiit paasissutissiipput.
Toqusup ilaqutai ilisimatinneqarsimasut Politiit nalunaarput.
