Politiinngorusuppit?

Politiitut ilinniarfimmut qinnuteqarsinnaaneq oktobarip 15-iata tungaanut sivitsorneqartoq Kalaallit Nunaanni Politiit nalunaarutigeqqammerpaat.

Politiit illoqarfinni arfinilinni septembarimi oktobarimilu aaqqissuussipput: Sisimiuni, Ilulissani, Aasianni, Nuummi, Tasiilami Qaqortumilu. Soqutiginnittut suliffik, periarfissat piumasaqaatillu pillugit paasisaqarsinnaapput. Illoqarfinni assigiinngitsuni qaqugu pissanersut politiit Facebookiminni allataat ataani takusinnaavat.

- Soqutiginnittut tamarmik tikilluaqquneqarput – naapinnissat qilanaaraarput, politiit allapput.

Naalagaaffiup Kalaallit Nunaanni eqqartuussiveqarnermi suliassaqarfinni annertusaarniarlutik nalunaaruteqareersullu aaqqissuussisoqarpoq. Politiinik amerlanerusunik atorfinitsitsisoqarnissaa ilaatigut sulissutigineqarpoq.

Sulisut kalaallisut oqaasillit amerlanerulernissaat anguniarlugu suliniuteqartoqassasoq aamma pilersaarutaavoq. Unnuit arfinillit taakkua ingerlaneranni saqqummiussinerit kalaallisut imaluunniit kalaallisuunngortitsisumik oqalutseqarluni pissasut politiit ilisimatitsipput.