Politiit aamma sarfaaruttut: Politiit pigaartui minutsit 30-t innaallagiaqarsimanngitsut
Sarfaaruttoqartillugu innaallagialersuut piareersimasussaagaluarpoq. Taamaakkaluartoq Nuuk decembarip 28-ani sarfaarummat Kalaallit Nunaanni Politiit pigaartui aamma innaallagiaarupput. Pisoq Aaja Chemnitzip Folketingimi apeqquteqaateqarneranik kinguneqarpoq.
Kalaallit Nunaanni Politiit Kalaallit Nunaanni upalungaarsimasullu oqartussaasut allat peqataaffigisaannik ataatsimiipput, tamannalu decembarip 28-ani pivoq.
Nuummi decembarip 28-ani innaallagiaaruttoqarnera illoqarfiit pingaarnersaanni sumiiffinni arlalinni piareersimaffiginngisanik ajornartorsiortitsivoq. Kalaallit Nunaanni Politiit aamma taamaassimasut Sermitsiap maanna allaaseraa. Tamannalu politikkikkut qisuariarfigineqarpoq.
Politiit allallu suliffeqarfiit suliassat pingaarnerpaat aallussinnaaqqullugit innaallagiaaruttoqassagaluarpat atorsinnaasaminnik generatoreqarput. Taamaakkaluartoq Kalaallit Nunaanni Politiit pigaartuisa allaffiat piffissami sivisujaami innaallagiaqarsimanngilaq.
Politiit pisimasoq Sermitsiamut uppernarsarpaat naatsumillu nassuiaateqarlutik:
– Innaallagiaaruttoqartillugu Kalaallit Nunaanni Politiit innaallagissamik pilersuisumik batteeritortumik peqarput. Aaqqiissut tamanna ajunngilaq. Generatori issinnera pissutigalugu ajoquserneqanngilaq, imaluunnit innaallagissamik pisariaqartinneqartumik tamakkiisumik pilersuiniarnermini2 ajornartorsiuteqarani.
– Sarfaaruttoqartilluguli innaallagissamik pilersuisussap ikittaataa batteritortoq ajoquteqarsimavoq ingerlaannarlu aallartissinnaasimanani. Sarfaaruttoqarnera pissutigalugu pigaartut allaffeqarfianni qarasaasiat ilaat qameriarlugit ikeqqinneqartariaqarsimapput. Akunnerup affaata missani pigaartut allaffiat innaallagiaqanngilaq.
Politiit mobilikkut attaveqarfigineqarsinnaasut
Oqarasuaat nalinginnaasumik attaveqarfigineqarsinnaasoq innaallagiatortuummat innuttaasut politiinut attaveqarnissaannut sunniuteqarpoq. Taamaattumik innuttaasut normumut allamut attaveqarnissaannik politiit innersuuppaat. Politiit mobiilikkut attaveqarfigineqarsinnaanngorlugit.
Politiit periuseq malinneqartoq ilanngullugu paasissutissiissutigaat, innuttaasunillu politiinut attaveqarniaraluarlutik iluatsinngitsoorsimasunik ilisimatitsisoqarsimanngitsoq.
– Innuttaasut piffissami tassani Kalaallit Nunaanni Politiinut attaveqarsinnaasimapput. Aammattaaq sinerissami politeeqarfinnut oqarasuaatit ajoquteqaratik, taamaammallu Kalaallit Nunaanni Politiinut oqarasuaataat pingaarneq kisimi ajortissimalluni.
Inatsisinik atortitsinermut ministeri nassuiaassaaq
Qanorluunniit pisoqaraluarpat politiit upalungaarsimanermi qitiusumik inissisimaffeqarput, taamatullu pisoqarnissaanut piareersimalluinnartariaqarlutik. Taamaattumik pisoq danskit naalakkersuisuinut paasiniaanissamik tunngaveqartoq Folketingimi ilaasortaq Aaja Chemnitz (IA) isumaqarpoq:
– Batterii peqqutaalluni taamaattoqartoq paasivara, generatoriunngitsoq. Politiilli inuiaqatigiinni immikkut akisussaaffeqarput, ingammik taama pisoqartillugu. Taamaattumik pisoq tamanna tunngavigalugu inatsisinik atortitsinermut ministerimut apeqqutigissavara politiit pissutsinut taamaattunut naammattumik piareersimanersut.
– Aamma ajoqutaasinnaasut pillugit misissuisoqarnissaa kissaatigaara, tassa upalungaarsimanermut attaveqaatinullu pingaarutilinnut tunngatillugu ajornartorsiuteqarsinnaanermut. Tamanna pisinnaavoq sarfaaruttoqartillugu, aammali immap naqqatigut kabelip kipinerani, Aaja Chemnitz oqarpoq.
Issileruttornerani generatori
Decembarip 28-ani Nuummi ima issitsigisimasoq allaat “generatorit qerillutik/tamaviaalutik”, tamannalu Sermitsiap pisortatigoortumik allakkatigut pissarsiaraa.
Politiit akissumminni erseqqissarpaat generatoritik issikkaluartoq ingerlalluartut, taamaattumillu suli paasinarsinngilaq generatorit sorliit pineqarnersut.
Taamaattumik atuartartutta ilaasa Nuummi sarfaarunnerup nalaani generatorimik atuisut issippallaarnera pissutigalugu generatorip innaallagissamik pilersuiniarneranik ajornartorsiuteqarsimasut nalunngisaqartulluunniit Sermitsiap tusarfigerusuppai.
