Politiit annertuumik ulapaarput
Nuna tamakkerlugu Kalaallit Nunaanni Politiit imigassamik aalakoornartumik imertoqarsimaneranut tunngatillugu pisunut assigiinngitsunut orniguttariaqartarsimapput. Arlallit isertitsivinni sinittariaqarsimapput.
Ulloq unnuarlu kingulleq Kalaallit Nunaanni Politiit nuna tamakkerlugu annertuumik ulapaarsimapput.
Leiff Josefsen
- Amerlanerit maanna anisimalereerput, kisianni suli inuit imigassartorsimallutik isertitsivinni arlalinni sinitsitsinneqarput, Kalaallit Nunaanni Politiit nakkutilliisuutitaasa pisortaat Anette Ostenfeldt Sermitsiamut oqaluttuarpoq.
Aqqusinermi eqqissiviilliornerit, angerlarsimaffinni nipiliornerit, aaqqiagiinnginnermi eqqissiviilliornerit allallu imigassamik aalakoornartortalimmik imertoqarsimanerata kingunerisaanik politiit suliassarpassuarnik ulapaarnerannik kinguneqarput:
- Pingaartumik Nuummii, kisianni aamma avannaani, Kangiani, Kujataani aamma kitaata sinnerani sumi tamaani ikiuukkiartortariaqarsimavugut inuit eqqissitinniarlugit, tamatuma malitsigisaanik aamma inuit arlalissuit isertitsivinnut mattuttariaqarsimavagut, imigassartorsimanerminnillu eqqissiviilliorsimanerat qaangiunniassammat, politiit nakkutilliisuutitaasa pisortaat Anette Ostenfeldt oqaluttuarpoq.
Annertunerusumik ajoqusertoqanngilaq
Eqqissiviilliornerit amerlasimagaluartut, taamaattoq politiit nakkutilliisuisa pisortaat oqaluttuarpoq inoqammik ulorianartorsiortitsilluni pinerluttoqarsimanngitsoq:
- Ulloq unnuarlu kingulleq annertuumik ulapaaraluarluta, aamma innuttaasunik arlalinnik isertitsivinnut mattussisariaqarsimagaluarluta, qujanartumik navianartorsiortitsisumik pisoqarsimanngilaq, maannalu imigassartorsimasut kingulliit iterunik isertitsivinniit aneqqinnissaat utaqqisaaginnalerpoq, Kalaallit Nunaanni politiit nakkutilliisuutitaasa pisortaat, Anette Ostenfeldt, naggasiivoq.
