Politiit arnaq puiguttortoq ujaaraat

Nanortalimmi arnamik 67-inik ukiulimmik ujaasineq marlunngornermi nanginneqassasoq politiini pigaartut pisortaat Aputsiaq Hansen Sermitsiamut oqarpoq.

Arnaq ujaarineqartoq politiit Facebookimi quppernerminni Arnaq ujaarineqartoq nalunaarutigaat.

Arfininngormat apriilip tallimaani nalunaaqutaq 12.00 missaani kimmut ingerlasoq Chemnitz-ip aqqutaani B-204 nalaani kingullermik takuneqarsimavoq.

67-inik ukiulik puiguttortuuvoq ilimagineqarlunilu kingullermik takuneqarami qanga illorisimasami, ilaquttami ikinngutimiluunniit najugaarinikuusaannukarsimasinnaasoq.

Nanortalimmi innuttaasut najukkaminni quitik, pequtaasivitik, angallatit assigisaallu misissorneqqullugit kaammattorneqarput.

Maqaasineqartoq 160 cm. missaannik angissuseqarpoq, tuattuuvoq takisuunik qeersaanik nujaqarpoq, qasertumik qalipaatilimmik kavaajaqarnerarneqarpoq qaamasunillu cowboybukseqarluni.

Maqaasineqartoq pillugu ilisimasaqartut politiinut sianeqqullugit kaammattorneqarput: 70 14 48.