Politiit iliuuseqarnerisa kingorna aqqusinernik assersuineq atorunnaarsinneqarpoq
Nuummi marlunngornerup ullaap tungaani aqqusineq politiinit assersorneqarpoq. Angut ataaseq tigusarineqarpoq.
Kalaallit Nunaanni Politiit
Toqqorsivimmit assiliisoq: Leiff Josefsen
Politiit iliuuseqarnerannut atatillugu Nuummi aqqusineq Nuukullak marlunngornermi ullaap tungaani nalunaaqutaq 08.30-miit 09.30-p tungaanut assersorneqarsimavoq.
Angut aallaammik sioorasaarimmat politiit sumiiffik assersorsimagaat, pigaartut pisortaat Jørgen Madsen Sermitsiamut oqarpoq.
Pisoq Nuukullaap eqqaani pisimavoq.
Angut nalunaaqutaq 09.30 missaani tigusarineqarpoq, tamatumalu kingorna aqquserngup assersorneqarnera atorunnaarsinneqarpoq.
- Sumiiffimmi tassani angallaneq isumannaaqqilerpoq, Jørgen Madsen oqaluttuarpoq.
