Politiit scooterinik unioqqutitsilluni atuisunut mianersoqqusipput
Scootererpassuit inatsisinut naapertuutinngillat, politiit oqarput.
Taamaattumik Kalaallit Nunaanni Politiit scooterinik piginnittut tamaasa kajumissaarpaat scooteritik piumasaqaatinut atuuttunut naapertuunnersut misissoqqullugit.
Assiliisoq: Leiff Josefsen
Scootererpassuit Kalaallit Nunaanni inerteqqutaasut politiit ilisimatitsipput.
Knallertit pillugit nalunaarummut scooterit naapertuuttariaqarnerinik tamanna peqquteqarpoq, isikkamillu aqussinnaasamik bremseqarnissaat tassani piumasarineqarpoq.
Kalaallit Nunaanni scooterit maleruagassat taakkua maleruartariaqaraat, allaasinnaanngitsorlu, Angallannermut Aqutsisoqarfiup politiinut erseqqissarpaa.
Tamanna pissutigalugu politiit ima kajumissaaripput:
- Taamaattumik scooterinik piginnittut tamaasa atortussanut nalunaarummi scooteritik piumasaqaatinut naapertuunnersut misissoqqullugit Kalaallit Nunaanni Politiit kajumissaarpaat.
- Scooterit inatsisinut naapertuutinngitsut akiligassiissutaasinnaapput, scooterillu arsaarinnissutigineqarsinnaapput.
1979-imi knallertit pillugit inatsit atuutilerpoq.
Ukiup ataatsip missaata matuma siorna sikkilit innaallagiartortut inerteqqutaanerat paasineqarmat politiit assingusumik nalunaarput, inatsit pisoqaavallaartoq pissutigalugu. Kingornali inatsit allanngortinneqarpoq, taamaalillutik sikkilit innaallagiartortut maanna akuerisaapput.
