Politiit suliaqartut: Inuusuttut aallaasersortut ujaarineqarput

Inuusuttut pingasut Inuk Hostelip eqqaani qeqertaaqqamiit aallaasersortut politiit sisamanngornermi ullaakkut nalunaaqutaq 06.54 nalunaarfigineqarput.

Illoqarfiup tungaanut aamma eqqarsimagunartut, politiinit Carl Sværd oqarpoq.

Inuusuttut taakku pingasut imigassartorsimagunarput umiatsiaaqqamillu aluminiumik sanaamik qeqertaaqqamukarsimallutik.

Nunamullu uteqqissimariarlutik arpaannaq qimaasimapput.

Taamaattumik politiit taakku pingasut Nuummi sisamanngormat ullaakkut ujaaraat.

- Angutit marluk arnarlu 18-it 19-illu akornanni ukioqartut qernertunik atisaqartut pineqarput, Carl Sværd oqarpoq.

Taakku qoorortuuaraq qimaanerminni igissimagaat aamma oqaatigaa. Qasseriarluni aallaasoqarsimanersoq paasiniarlugu politiit qimmilerlutik qeqertami tassani misissuipput.

- Pisumut tamatumunnga tunngatillugu paasissutissaateqarsinnaasut inuusuttulluunniit kikkuunerannik ilisimannittut tusarfigerusuppavut, Carl Sværd oqarpoq. Politiit oqarasuaammut 70 14 48-mut attavigineqarsinnaapput.

Inissiaq assersorneqartoq

Taassuma pisup saniatigut politiit Nuup qeqqani sisamanngornermi ullaakkut aamma suliaqarput.

Inissiap ilaa Ceresvejimiittoq politiinit assersorneqarpoq.

Politiit arlallit sumiiffimmiittut takunnittoq Sermitsiamut oqarpoq.

Politiit ulapaarnerat pissutigalugu suliap suuneranik suli paasisaqarsinnaasimanngilagut.