Politiit sullissinerminni ikilerneqarsimasut ikiorneqarsinnaalissasut
Kalaallit Nunaanni politiit uippakajaalertarnerat PTSD-millu nalaataqartarnerat Danmarkimi suliniaqatigiiffiup Thin Blue Linep iliuuseqarfiginiarpaa.
Thin Blue Linep Danmarkimi politiit sullissinerminni ajoqusersimasut 2016-imiilli ikiortarpai.
Assi: Leiff Josefsen
Thin Blue Line Denmark Kalaallit Nunaanni maajip naanerani immikkoortortaqarfittaassaaq, tassani politiit kalaallit tapersersorneqarsinnaalissallutik.
Politiit sullissinerminni timikkut tarnikkulluunniit arlaatigut ajoquserneqarsimasut ikiorneqartalissapput.
Danmarkimi peqatigiiffiup Thin Blue Linep tusagassiuutinut nalunaarummini tamanna paasissutissiissutigaa.
Politiitut sulinerup ilungersunartuunera ulorianartuuneralu ilaatigut VIVE-p – Kalaallit Nunaanni atugarissaarnermut misissuisarfiup – 2020-mi nalunaarusiaani uppernarsarneqarpoq.
Kalaallit Nunaanni politiit 10 procentingajaat PTSD-mik nalaataqartut, 14,6 procentillu uippakajaalersartut nalunaarusiami inerniliunneqarpoq.
Sullissinermi ajoqusertilluni aaqqissuussaanikkut upalungaarsoqaranilu tapersersortissanik soqanngitsoq Thin Blue Line isumaqarpoq. Tamannalu maanna allanngortinniarneqarpoq.
Politiit iliuuseqarnerusinnaapput
Kalaallit Nunaanni politiit 38 procentii minnerpaamik ataasiarlutik inuunerminnik navianartorsiortitsisumik misigisaqarsimasut, soorlu aallaaneqarsimasut, sakkulinnit saassunneqarlutik imaluunniit aqqunarluinnarlutik VIVE-p misissuinerata takutippaa.
Aammattaaq 66 procentii sulinerminni nakuuserfigineqartarsimapput.
Politiit suliatik sakkortusinnaagaluartut ikiorneqarnissamik periarfissatik naammagisimaarpaat, assersuutigalugu sakkortuumik pisoqarsimatillugu tarnip pissusianik ilisimasalimmit ikiortissarsiortoqarsinnaanera.
Politeeqarfik sulisunik ikiuiniarlutik iliuuseqarnerusinnaallutik misissuinerup takutippaa.
Tassalu tamanna Thin Blue Linep iliuuseqarfiginiarpaa. Danmarkimi politiit ajoqusersimasut 2016-imiilli attaveqaatitigut, sammisaqaqatigiinnikkut suliatigullu ingerlariaqqinnissamik ikiortarpaat.
- Kisimiinnginnissap qanoq pingaaruteqartiginera nalunngilarput. Maanna suliniut tamanna Kalaallit Nunaannut, Danmarkimit pisariaqartitsiffiunerusumut – politiillu amerlasuut taamatut tapersersorneqarnissaminnik sivisuumik ujartuiffiusumut – atuutilersipparput, allapput.
