Politikkeri nipangiussisussaatitaanermik unioqqutitsisimasutut pasineqarluni pasisaajunnaarsarneqarusuppoq
Naalakkersuisunut ilaasortamit nipangiussisussaatitaanermik unioqqutitsisimaneragaanini pillugu pasisaajunnaarsarneqarusulluni Jens Napãtôk’ Naleqqameersoq politiinut unnerluutiginnippoq.
Jens Napatôp naalakkersuisunut ilaasortaq politiinut unnerluutigaa.
Assiliisoq: Leiff Josefsen
Aalisarnermut inatsisip pingajussaaneerneqarnissaa sioqqutitsiarlugu, aalisarnermut ataatsimiititaliami ilaasortap Jens Napãtôp (N) ataatsimiititaliami isumaqatiginninniarnerni paasissutissanik nalunaaruteqarsimanera pillugu, aningaasaqarnermut naalakkersuisoq Siumumilu siulittaasoq Erik Jensen (S) tupaallannartumik nalunaarpoq politiinut unnerluutiginiarlugu politiit oqaloqatigisimallugit.
Erik Jensenip uppernarsaatissaa tassaasimagaluarpoq Jens Napãtômik immiussineq, tassanilu politikkeri oqaaseqartoorsimavoq.
Jens Napãtôp eqqunngitsuunerarpaa, Sermitsiallu paasissutissaatai naapertorlugit politikkerip maanna naalakkersuisoq Erik Jensen inatsisinik unioqqutitsisumik immiussisimanera pillugu unnerluutigisimavaa.
- Pissutissaqanngitsumik pasilliinerit
‘Pissutissaqanngitsumik nikanarsaanerit’ unitsikkusullugit Jens Napãtôk’ Sermitsiamut SMS-ikkut nalunaarpoq:
- Naalakkersuisup Erik Jensenip pasilliutai tupigusuutigeqalugit malinnaavigisimavakka. Pasilliinerit tunngavissaqanngitsut akerlilerneqanngippata ilumoortunngoqqajaasinnaasarput.
Jens Napãtôk’, suliap naammassinissaata tungaanut oqaaseqaqqikkusunngitsoq, ima allappoq: "Taamaattumik oqartussaasut pisariaqartumik iliuuseqaqqullugit qinnuigaakka."
Erik Jensen Sermitsiamut ilisimatitsivoq - Inatsisartut ataatsimiittarfianiit taanna aamma SMS aqqutigalugu ilisimatitsilluni, oqallinnerit suli ingerlammata - suliaq tusaatissatut tigullugu innersuussillunilu suliamut tunngatillugu siusinnerusukkut oqaaseqaatigisimasani.
Siusinnerusukkut Erik Jensen suliaq pillugu imatut oqarnikuuvoq:
- Ataatsimiititaliami suliarineqarnera isumaqatigiinniarnernilu sumi inissisimaffeqarneq aalisarnermik suliffeqarfissuarmi piginnittunut ingerlateqqinneqarsimapput.
- Taamaaliorneq nipangersimasussaatitaanermik unioqqutitsineruvoq, Erik Jensen taamanikkut oqarpoq.
Oqartussat tatigaavut
Naleqqap siulittaasua Pele Broberg suliaq pillugu sukumiinerusumik oqaaseqarusunngilaq, tusagassiuutinut nalunaarummili ima oqarpoq:
- Maanna Naalakkersuisoq politiinut nalunaarutigineqarpoq, oqartussallu suliamik siunissamut isigisumik iliuuseqarfiginnikkumaartut Naleqqamit tatigaarput, Pele Broberg oqarpoq.
Naalakkersuisumit Siumumilu siulittaasumit Erik Jensenimit oqaaseqartitsinissani Sermitsiap sulissutigaa.
