Politikkimi suliaqarnermi qaffasissumik inissisimasimasoq kannguttaatsuliorsimasutut pisuutinneqartoq

Politikkimi qaffasissumik inissisimasoq Sisimiuni efterfesternermi kannguttaatsuliorsimasutut pisuutinneqarluni eqqartuussaavoq.

Arnaq pineqartoq sofami qasertumi chaiselongiusumi sinittoq kannguttaatsuliorfigineqarsimasoq eqqartuussiviup uppernarsarneqartutut nalilerpaa. Arnaq angut qaaminiittoq angummillu uluakkut siggukkullu kunissorneqarlunilu iterpoq. 

Eqqartuussivimmi nassuiaatigineqarpoq unnummi tassani nipilersortoqartoq qittattoqarlunilu, tassani unnerluutigineqartoq pinerlineqartorlu peqataapput. Tassani aatsaavissuaq imminnut naapipput. Efterfestimi peqataasut aniammata arnaq angullu illumi kiserngorupput.

Eqqartuussut

Unnerluussut naapertorlugu pisoq marsip ulluisa 17-anni siorna pivoq, nalunaaqutaq ullaakkut qulingiluat missaanni. Arnaq eqqartuussivimmi nassuiaavoq aalakoorujussuarnani eqqaamasaateqarlunilu.

Eqqartuussivik aalajangerpoq politikkimik qaffasissumik inissisimasoq ulluni 14-ini pineqaatissinneqarsimasunut inissiisarfimmiittussanngortinneqassasoq, ukiulli ataatsip iluani pinerloqqissimanngippat tamanna atorunnaarsinneqassaaq. Angut 5.000 koruuninik taarsigassinneqarpoq.

Unnerlussummi, Sermitsiamit pissarsiarineqarsimasumi, allassimavoq unnerluutigineqartup arnaq kannguttaatsuliorfigisimagaa, tassami martsip 14-ani 2024-imi unnerluutigineqartup arnaq uluaatigut qaniatigullu kunissimagamiuk arnaq pisumi akerlioriarsinnaannginnerani, kiisalu atisaqartillugu timaatigut attualaarsimallugu.

Unnerluussimmulli kingullernut allasimasunut angut pinngitsuutinneqarpoq.

Eqqartuunneqartup illersuisuatalu suliaq Nunatta Eqqartuussisuuneqarfianut suliareqqitassanngortippaat.

Suliami unnerluutigineqartup aqqa illersorneqarpoq, taamaammat kina unnerluutigineqarnersoq paasineqarsinnaajunnaartillugu ilisimaneqaatigisinnaasai allaaserisami ilanngunneqarsinnaanngillat.