Puiaasanik utertitseriaaseq eqqakkanik ingerlatsivimmut aningaasatigut unammillernatoqartitsisoq

Esani A/S-ip utertitsisarnermik aaqqissuussinermik ingerlatsineq pissutigalugu aningaasatigut ajornartorsiornera pissutigalugu Esani A/S nunatta karsianit 15 millionit koruuninik taarsigassarsisinneqarnissaa Naalakkersuisut siunnersuutigaat.

Esanip puiaasat utertinneqarsimasut, ilaatigut qillertuusat sodavandinik imeruersaatinillu nukissaqalersitsisunik imaqarsimasut manissunngorlugit naqitat, suliarisarpai.

Toqqorsivimmit assi: Leiff Josefsen

Thomas Munk Veirum Thomas Munk Veirum Tusagassiortoq

Saqqummersinneqarpoq 25. Aggusti 2026 - 15:54

Ussassaarut

Kommunip eqqagassalerinermik ingerlatseqatigiiffiutaa Esani aningaasanik atoriaannarnik amigaateqarluni tatineqarpoq, taamaammallu nunatta karsianit 15 millionit koruunit tikillugit atuisinnaanissaa Naalakkersuisut aningaasanut inatsisissatut siunnersuumminni siunnersuutigaat.

Esani aningaasaqarnikkut ilaatigut utertitsisarnermik ingerlatsinermit tatineqartoq Naalakkersuisut 2027-mut aningaasanut inatsisissatut siunnersuummi allapput:

– Pisiniarfinnut utertitanik akiliutit Kalaallit Nunaannut utertitassanik puunik eqqussuinermi nioqqutissat puuinut akiligassanngortinneqartunit annertunerunerat, utertitsisarnermik aaqqissuussinermi ilungersunartorsiornermi patsisaanerpaavoq. Amigartoorut taanna manna tikillugu ingerlatseqatigiiffimmi kassekreditikkut aningaasalersorneqarpoq, Naalakkersuisut allapput nangillutillu:

– Puunik utertitsisarnermik aaqqissuussineq taamaalilluni naatsorsuutigineqartunit annertuumik nikingasoorfiuvoq, ESANI A/S-immi nioqqutissat puuinik utertitsisarnermik aaqqissuussinerup ingerlanneqarneranit iluanaaruteqarnissaq ilimageqqaarmagu.

Utertitsisarnermik ingerlatsineq inuiaqatigiit akisussaaffigigaat, tamannalu tunngavigalugu Esani suliassamut tamatumunnga aningaasatigut ataatsimoorussamik karsimit tapiiffigineqartariaqartoq Naalakkersuisut erseqqissarpaat.

Ussassaarut

15 millionit koruuninik akiliisinnaanermik aaqqissuussineq aaqqiissutissaagallartuusoq Naalakkersuisut naatsorsuutigaat. Utertitsisarnermik aaqqissuussinermi ajornartorsiutit misissoqqissaarniarlugit kukkunersiuisut nalunaarusiaat suliarineqarpoq, tassanilu unammilligassat qulaajarneqassapput.

Utertitsisarnerulli aaqqissuussaanera kommunip ingerlatseqatigiiffianut unammillernartutuaanngilaq. Naalakkersuisut naapertorlugit Ikuallaavinnit kiassarnermik tunisinermi isertitanik amigaateqarnermi annertuunik unammilligassaqarnera, eqqakkanillu angallassinermut attuumasunik unammilligassaqarnera, Esanip ilanngullugu ilisimatitsissutigaa.

Sermitsiap sammisamut atatillugu Esani oqaaseqartinniarlugu sulissuteqarpoq.