Putin Ukrainemut sorsukkaluarluni neriorsuivoq Gaza-mut tapersersuissalluni

Rusland nammineq killeqarfimmi iluani sorsunnermik ingerlataqaraluarluni, taamaattoq palæstinamiut Gaza-miittut puigorneqanngillat.

Ruslandip præsidentiata, Vladimir Putinip, tamanna Palæstinami Namminersorlutik Oqartussat siulittaasuannut Mahmoud Abbasimut neriorsuutigivaa.

Ruslandimi naalagaaffiup tusagassiiviani Tass-imi tamanna allaaserineqarpoq.

- Tamanit ilisimaneqarpoq, Ruslandip soqutigisai innuttaasullu illersorniarlugit sakkut atorlugit uggornaraluartumik akersuuppugut. Kisianni qularutigineqassanngilaq, Kangiani Qiterlermi - Palæstinami qanoq pisoqarnera malinnaaffigilluinnarparput, Putin oqarpoq.

Siuttut taakku marluk ataatsimeeqatigiinnerat Ruslandip illoqarfiisa pingaarnersaanni, Moskvami, pivoq.

Ruslandip præsidentia oqarpoq, Rusland "annertuumik aliasuutigalugu ernumassuteqarluni" Gaza-mi inuit sorsunnerup piliaanik ajunaarnersuarmik nalaataqarfiunera innersuussutigalugu.

- Soorlu ilisimagit, pprtukkat 700 tonsit assigiinngitsunik imallit nassiunnikuuagut (Gazamut, aaqq.) sapinngisarpullu tamaat periarfissagullu taamaasa atorlugit Palæstinamiut tapersersorpagut, Tass naapertorlugu Putin oqarpoq.

Gazami sorsunneq aallartippoq palæstinensiskiusup Hamasip oktobarimi ukioq kingulleq Israelimut saassussinerata kingorna. Sorsunnerup ingerlanerani nerisassanik imermillu saligaatsumik Palæstinamiut annertuumik amigaateqarput.

Maannamut palæstinenserit 40.000-it pallillugit sorsunnermi toqutaapput, Hamasimit aqunneqartut peqqinnissaqarfiit Gazami marlunngornermi nalunaarutigaat.

Moskvami ataatsimeereernerup nalaani Mahmoud Abbas erseqqissaavoq, palæstinenserit Ruslandimut qanittumik attaveqarfigigaat, nunali taanna, tassa Rusland nunanit tamalaanit tununneqarnikuuvoq Ukrainemut sorsulluni aallartimmalli.

- Hr. præsident, oqaloqatiginninnissat siunnersuutinillu avitseqatigiinnerput uannut nuannersuuvoq. Illit upperaatsigit tatigalutillu, tapersersuinerit malugisinnaavarput. Illinnut peqataavugut, neriuutigaarpullu taamaattuassasoq.

- Rusland Palæstinamiut ikinngutaasa annerpaat ilagaat, Tass naapertorlugu taama oqarpoq Mahmoud Abbas.

Ruslandip siornatigut Israelimut Palæstinamiunullu naapertuilluartumik attaveqarnerminik takutitsisimagaluarpoq, maannali Gaza-mi sorsunnerup nalaani Palæstinamiunut - Hamas ilanngullugu - qaninnerulersimavoq Israelimiillu ungasinnerulersimalluni.

Mahmoud Abbas Hamas Gaza-miittoq sinnerlugu sinniisuunngilaq, kisianni Palæstinami Namminersorlutik Oqartussat sinnerlugit sinniisuulluni, taakku Vestbreddenimi najugaqarput.

/ritzau/