Qaalerluta innarneq ajorpugut

Nioqqutissat ulluinnarni pisiarineqartartut akii isertitanut sanilliullugit ukiuni kingullerni qaffangaatsiarput, tamannalu Nuka Ole Berthelsenimut, nulianilu Maniitsumi najugaqartunut, sunniuteqarpoq.

Aappariit arfineq-pingasunik qitornaqartut qitornatik angajulliit pingasut inersimasunngorlutik nammineq ineqalersimammata nukarliit tallimat najugaqatigaat.

- Maniitsumi inunngorlungalu peroriartorpunga, peqqininssaqarfimmilu oqaluttaallungalu saniatigut allanik marlunnik suliffeqarpunga, Nuka Ole Berthelsen AG-mut oqaluttuarpoq.

Nuka Ole Berthelsen nulialu SIK naapertorlugu aningaasarsiaqarput, ilaqutariillu niuertarfinni akit qaffannerujussuat malugisinnaagaat taanna oqaluttuarpoq.

- Akit piffissap sivikitsup ingerlanerani qaffangaatsiarput, tamannalu soorunami angerlarsimaffitsinni malugisinnaavarput, taanna oqarpoq.

Nuka Ole Berthelsenip meerasa ilai meeqqerivimmiittarlutillu ilai meeqqat atuarfianni atuartuupput.

- Qallersuutissat paarnallu pingaaruteqarput, ingammik meeqqanut meeqqat atuarfianni atuartunut. Akilli peqqutigalugit annikinnerusut pisiarisariaqartarpagut. Sipaareertigaluta sipaarnerulertariaqarpugut, Nuka Ole Berthelsen oqaluttuarpoq.

Igaartunnginnerusut

Ilaqutariit pisiarisartagaanni qallersuutissat iipilillu kisimik annikillineqanngillat. Aamma neqit. Akit suli qaffannerunngikkallarmatali akit qaffasinneri pissutigalugit ilaqutariit ullut tamaasa igaartortarunnaassallutik isumaqatigiissimapput.

- Ullut allortarlugit igaartortarpugut. Maannali akit qaffaqqimmata suli igaartunnginnerulernissarput qularinngilara. Immaqa sapaatip akunnerata ingerlanerani pingasoriarluta igaartortalissaagut, taanna oqarpoq.

- Qaalerluta innarneq ajorpugut. Ajoraluartumik, Nuka Ole Berthelsen oqaluttuarpoq.

Sermitsiaq naapertorlugu immuit, immussuit, immuup kinertortai manniillu akii ukiut kingulliit qulit ingerlanerini – 2015-imi januaarimiit 2025-mi januaarimut – 25,3 procentimik qaffassimapput. Tamanalu ilaqutariit Berthelsenikkut malugisinnaavaat. Ingammik margarinap, paarnat, kaffit, neqit qajuusallu akiisigut.

- Peqqinnartunik nerissasugut kajumissaarutigineqarpoq, peqqinnartunillu soorunami nerisassaagut. Peqqinnartunilli nerisassagutta paarnanik naatitanillu, neqinik, aalisakkanik iffianillu nerisariaqarpugut. Ulluinnarni nerisanngikkutsigit taama suvugut? Napparsimanerulersinnaavugut, taanna oqarpoq.

Ilaqutariit niuerniaraangamik 300 koruunit missaat niuerniarnerminni akiliutissatut nassartarpaat. Aningaasat annermik unnukkorsiutissanut meeqqallu taquassaannut atorneqartarput.

- Ullut tamaasa aamma niuerniarneq ajorpugut. Immaqa ullut allortarlugit. Eqqarsaatigilluanngikkutsigu ajornakusoortorujussuanngorsinnaavoq, Nuka Ole Berthelsen oqaluttuarpoq. 

Iliuuseqartoqarnissaa neriuutigigaa

Nioqqutissat ulluinnarni pisiarineqartartut akiisa qaffanneri nunatsinni atuisut malugereerpaat, Namminersorlutillu Oqartussat inissiaataanni ineqarnermut akiliutit 2027-miit aamma qaffattussaapput, Sermitsiaq allappoq.

- Sumut ingerlanerput ernumanartorujussuuvoq. Ineqarnermut akiliut akilerneqartussaavoq, aamma innaallagissamut, kiassarnermut imeqarnermullu akiliut. Isertitakinnerusut siulliullugit eqqaavakka. Taakkumi? Amerlasuut iniminniit anisitaanissaat qularinngilara, taanna oqaluttuarpoq.

Akisussaasut iliuuseqarnissaat Nuka Ole Berthelsenip neriuutigaa.

- Oqartussat akinik suliaqartartut assigiinngitsut politikerillu qisuariarlutillu iliuuseqarnissaat neriuutigaara. Tassami inuppassuit akinik qaffaanernik assigiinngitsunik eqqugaangaatsiarput, taanna oqarpoq.