Qaanaami atuartut amerliartuinnartut
Sapaatip-akunnerani matumani Qaanaap atuarfiani atuartut 18-it 1. klassimi atualerput. Siornamut sanilliullugu amerlanerujussuupput, siornami atuartut tallimaannaat 1. klassimi atualermata.
Atuarfiup pisortaa Dan Normann Qaanaami atualeqqaartoq peqatigalugu.
Assiliisoq: Galya Morrell
Avanersuup Atuarfia Qaanaamiittoq aamma ‘Nunatsinni illoqarfinni atuarfiit avannarpasinnersaattut’ taaneqartarpoq, taamaalillunilu Danmarkip kunngeqarfiani illoqarfimmi atuarfiit avannarpasinnersaraat.
Atuarfilli avannarpasinnerusumiittoq tassaavoq Evap Atuarfia, Qaanaap avannaata kitaatungaani nunaqarfimmi Siorapalummiittoq.
Ataasinngormat aggustip aqqaneq-aappaanni nal. 11.00 atuartut 18-it 1. klassimi atualerput. Tamanna siorna atuartut tallimat atuartalernerinit amerleriarujussuarneruvoq.
Tamanna atuarfiup inersuaani nalliuttorsiorpalaartumik ingerlanneqarpoq, tassanilu arlallit Avanersuarmiutut assuuteqarput. Ullormi tamatumani angajoqqaat, aataakkut aanaakkullu aammalu ilaquttat ikinngutillu inersuaq ulikkaarpaat, atualerlaallu 1. klassimi atualersut atualernerup qanoq ingerlanissaa pissangallutik utaqqivaat.
Atuartut nuannaarlutik atualernissamut piareersimasut.
Assiliisoq: Andrey Pavlichenkov
Atuarfimmi pisortap Dan Normannip atualerlaat pissangasut tikilluaqqullugillu titartaaffigai, ullormilu tamatumaniinnaanngitsoq, aammali ukiup atuarfiusup ingerlanerani sunik pisoqassanersoq oqaluttuullugit.
Taava ilinniartitsisuisa klassimut, ilaquttanik assigiinngitsunik ukiulinnik ullormik nalliuttorsiutiginnikkusuttunik inunnik ulikkaaqqasumut, ingerlappai. Naggataatigut meeqqat kristumiut tussiutaat Annaasisunnguatta Asagamisigut tusarningaartumik tussiarneqariasaarpoq.
Naggataatigut pisarnertut 1.klassit assilineqarnissaat piffissanngorpoq. Qaanaami sapaatip-akunneri arlallit suli seqineq kaaviinnassaaq, taamaattumillu meeqqat taakku aasaq naallugu ulloq qanoq ikkaluaraangalluunniit silami pinnguartarput uisasinnaajunnaaraangamillu innartarlutik, ullormit unnuamillu aqunneqarnatik.
Sorianngitsorli ukiaq nipaatsoq eqqissisimasorlu takkutissaaq unnuarlu qalliartorpoq, kaperlannissaalu ungasigunnaariasaarpoq — novembarimit februaarimut.
