Qaanaami mittarfimmut aqqusiornissamik aningaasaliisoqarpoq
Inatsisartut aningaasaqarnermut akileraartarnermullu ataatsimiititaliaata Qaanaami mittarfimmut aqqutip siorna qarsutsinermit aserorneqartup aaqqissuunnissaanut Naalakkersuisut aningaasaliissuteqarnissamik qinnuteqaataat akuersissutigaa.
Qaanaami illoqarfiup mittarfiullu akornanni aqqusinermut utaqqiisaasumut sanaartugassat illoqarfimmi pigineqartut atorneqarput.
Ineqarnermut Attaveqaasersuutinullu Naalakkersuisoqarfik
Qaanaami mittarfimmut aqqutip iluarsaanneqarnissaa aasaru aallartinneqarsinnaalerpoq. Inatsisartut aningaasaqarnermut akileraartarnermullu ataatsimiititaliaata Naalakkersuisut aningaasanik qinnuteqaataat akuerimmagu tamanna piviusunngorpoq. Namminersorlutik Oqartussat nittartakkaminni taama allapput.
- Qaanaami mittarfimmut aqqusineq pillugu ilungersunartorsiornerup aaqqiissutissarsinera maannakkut iluatsimmat nuannaarutigaara.
- Illoqarfimmi najukkami entreprenørit pitsaasumik pilersitsiviulluartumillu suleqatigiinnermut qutsavigerusuppakka. Najukkami isumalluutit qanoq annertutiginersut aammalu taakkua atorluarnissaa qanoq pingaaruteqartiginersoq, suliassami matumani takutinneqarpoq, Ineqarnermut Attaveqaasersuutinullu Naalakkersuisoq Hans Peter Poulsen oqarpoq.
Ikaartarfik isumannaannerusoq
Qaanaami mittarfimmut aqqusernup ilaa siorna aasakkut sakkortuummik kuussuarneranit kuugussaavoq. Aqqusernermup ilarujussuaq aamma innarlerneqarpoq. Illoqarfiup mittarfianut aqqut angallaffissaajunnaarpoq illoqarfimmi sanasut utaqqiisaasumik aaqqiissuteqarput.
- Illoqarfimmi najukkami entreprenøri peqatigalugu maannakkut aqquserngup iluarseqqinnissaanut ataavartussamik aaqqiissutissarsisoqarpoq, najukkami pisinnaasaqartut atortussallu aallaavigineqarlutik.
- Suliassami ilaatinneqarput kuup tungaanut betonngimik suluusalimmik betonngimik ikaartarfiliorneq, taamaalilluni kuummiit imeq ikaartarfiup ataatigut immamut kuutsinneqarsinnaalerluni. Taassuma qaavani kuuffissaliisoqarpoq, imeq ikaartarfiup tungaanut eqqortumik kuussinnaalerlugu.
Qaanaami mittarfiup aqqutaata atorneqarnissaa kingusinnerpaamik ukiakkut naatsorsuutigineqarpoq.
