"Qaartoortoqarnerata" kingorna politiit angajoqqaanut kaammattuipput
Inuusuttuaqqat angerlarsimaffimminni qaartartunut assingusunik sanasartut pillugit politiit arlaleriarlutik nalunaarfigineqartarput. Aamma inuusuttuaqqat marluk meerarlu ataaseq tillitanik tigumiartut ataasinngornerup unnuaani unitsinneqarput.
Toqqorsivimmit assilisaq: Leiff Josefsen
Nuummi angajoqqaat meeqqaminnik inuusuttuaraatiminnillu eqqumaffiginneqqullugit politiit kajumissaaripput.
Ulluni kingullerni inuusuttuaqqat namminneq qaartartunut assingusunik sanaaminnik ilaatigut majuartarfeqarfinni qaartitsiaraqattaartut pillugit arlaleriarluni nalunaaruteqartoqarsimavoq.
Inuusuttuaqqat ilaat politiinit tigusarineqarsimasut politiit pigaartuisa pisortaat Carl Sværd oqaluttuarpoq, politiillu naliliineri naapertorlugit inuusuttut nittartakkani inuit attaveqatigiittarfiiniittut ilaarlugit iliuuseqartarput.
Illup iluani qaartartuliornermut atortussat ilaat tassaapput sodavandit puiaasaat kuuffinnullu saliissutit:
- Kuuffinnut saliissut neriornartuuvoq, amimut kiinnamulluunniit ulorianarsinnaalluni, Carl Sværd oqarpoq nangillunilu:
- Angajoqqaat meeqqaminnik eqqumaffiginnillaquneqarput.
Inuusuttuaqqat marluk meerarlu ataaseq tillitanik tigumiartut tiguneqartut
Meeraq ataaseq aqqaneq-marlunnik ukiulik inuusuttuaqqallu marluk 15-inik 17-inillu ukiullit ataasinngornerup unnuaani tillinniarsimasutut tigusarineqartut, Carl Sværd-imi aamma ilisimatitsivoq.
Pisimasoq tamanna Nuummi aamma pivoq.
Nalunaaqutaq 02.37 politiit pisiniarfimmi tillinniartoqarneranik nalunaarfigineqarput, kinguninngualu tillinniartoqaqqittoq pillugu nalunaarfigineqarput.
Pigaartut pisortaat naapertorlugu inuusuttuaqqat meerarlu taakku pingasut tillitanik tigumiarlutik unitsinneqarput.
