Akerliussutsimik piffissap sivikitsup iluani aappassaannik takutitsisut Inatsisartut ataatsimiittarfiata silataanut novembarip 20-ani ullup-qeqqanut katersuuteqqipput. Inatsisartut tummeraannut naneruutinik ikiteripput allagartarsualisaarlutillu ”Meeqqat utertinneqarlik”, ”411+” tassa meeqqat Danmarkimi angerlarsimaffiup avataanut inissinneqarsimasut amerlassusaat, ”Meeqqat siniffii imaqanngillat” aamma ”Meeqqat angerlaassigit”. ”Zammi pillugu maaniippugut” aamma ”Ajo, Frederik, Inuk, Aannguasiit, Zammi, Aqqaluk, Julia, Andre, Hans, Amalie, Kulunnguaq, Arnaaluk, Pilu, Druudu, Angaju, Pilunnguaq, Victor, Nuunu, Nuka, Peter, Aleqa, Aviula, Arnaq, Finni, Milo, Malik, Edvard, Bella, Sika, Steen…”
Inuit peqataasut amerliartortillugit nilliallattaasut amerliartorput:
Akerliussutsimik piffissap sivikitsup iluani aappassaannik takutitsisut Inatsisartut ataatsimiittarfiata silataanut novembarip 20-ani ullup-qeqqanut katersuuteqqipput. Inatsisartut tummeraannut naneruutinik ikiteripput allagartarsualisaarlutillu ”Meeqqat utertinneqarlik”, ”411+” tassa meeqqat Danmarkimi angerlarsimaffiup avataanut inissinneqarsimasut amerlassusaat, ”Meeqqat siniffii imaqanngillat” aamma ”Meeqqat angerlaassigit”. ”Zammi pillugu maaniippugut” aamma ”Ajo, Frederik, Inuk, Aannguasiit, Zammi, Aqqaluk, Julia, Andre, Hans, Amalie, Kulunnguaq, Arnaaluk, Pilu, Druudu, Angaju, Pilunnguaq, Victor, Nuunu, Nuka, Peter, Aleqa, Aviula, Arnaq, Finni, Milo, Malik, Edvard, Bella, Sika, Steen…”
Inuit peqataasut amerliartortillugit nilliallattaasut amerliartorput:
- FKU atorlugit misissuisarnerit qanoq piniarnersut paaserusupparput! FKU UNITSILLI!
- Naak naalakkersuisut siulittaasuat? Múte! Múte! Múte!
- Meeqqavut utertillik!
- Anniarpugut angajoqqaajusut, aanaakkut aataakkullu nunaqqataasullu anniaateqarpugut. Nunarput qiaqataavoq meeqqavut tigoorarpaat, - aatsaat ukiut 30-t qaangiuppata suaarutigineqassava utoqqatserneq - meeqqavut tigorusuppavut!
Inatsisartuni ilaasortat ataatsimiinnertik unitsillugu akerliussutsimik takutitsisunut tusarnaariartorput. Angajoqqaatut piginnaasanik misissuutit, FKU-mik taaneqartartut, akerliussutsimik takutitsivigineqarneranni Naalakkersuisut siulittaasuata Múte Bourup Egedep (IA) siullermeerluni anillaffigai.
Angerlarsimaffiup avataanut inissinneqarsimasut nalilersuiffigeqqinneqassasut piumasariniaraa
Muté Bourup Egedep naalakkersuisoq Aqqaluaq Biilmann Egede (IA) Danmarkimi isumaginninnermut ministerimik Sophie Hæstorp Andersenimik ataatsimeeqateqaqqaarsimanera siullertut eqqaavaa, tassanilu danskit misissueriaasiannik atuineq unitsinneqassasoq piumasarineqarsimasoq.
- Angajoqqaatut piginnaasanik misissuutit atorneqartarunnaarnissaannut timitaliiniarneq maanna alloriarfigineqarpoq. Aamma naalakkersuisuninngaanniit naatsorsuutigissavarsi siunissamut piuinnarnani kingumut aamma suliat nalilersorneqaqqinnissaat piumasarineqassammat, akerliussutsimik takutitsisunut Múte Bourup Egede oqarpoq, nipaannerarneqarninilu tusaallugu oqarluni.
- Inuit uani pineqarput aamma eqqunngitsumik kinaassusaat aallaavigalugu immikkoortinneqarnerat naalakkersuinikkut akuersaarneqanngimmat pingaarnerpaamik sulianik ingerlatsisaqattaarnikuuvugut. Aamma ukiut siuliini saaffiginninnerit qanorluunniit tiguneqartarsimaneri malitseqartarsimannginnerilu akuersaanngilavut. Naalakkersuisup susassaqartup danskit isumaginninnermut naalakkersuisuannik ataatsimeeqateqarnermini ersarissaqqissaarpaa akuersaanngikkipput, aamma iliuuseqarnianngippata ersarissorujussuarmik danskit naalakkersuisui iliuuseqarumanngitsut nalunaarutigissuarput, Múte Bourup Egede oqarpoq.
Isumaginninnermut ministerip ataatsimeeqatigineranit imaqarniliaq
Akerliussutsimik takutitsisut danskit isumaginninnermut ministeriata tusagassiuutinut oqaatigisimasaa pillugu nassuiaanissaq piumasaraat. Tassa kommunit angajoqqaat piginnaasaannik misissuutinik assuarineqaqisunik atuisarneq eqqarsaatigeqqissaaqqullugu kaammattorsimallugit – tamannalu misissuutit atorneqartarunnaarnissaannik isumaqannginnera naak Naalakkersuisut atorneqartarunnaassasut nalunaarutiginikuugaluaraat.
ERNGERTUMIK ATAATSIMIINNERMIT IMAQARNILIAQ
Aqqaluaq B. Egedep aamma Sophie Hæstorp Andersenip ataatsimiinnerannit imaqarniliaqartoqarsimanngitsoq isumaginninnermut ministeriaqarfiup Sermitsiamut paasissutissiissutigaa. Taamaattumik Meeqqanut Inuusuttunullu Naalakkersuisoqarfik kisimi imaqarniliorsimavoq.
Meeqqanut inuusuttunullu naalakkersuisoqarfiup ataatsimiinnermit imaqarniliaani isumaginninnermut ministerip angajoqqaanut kalaallinut eqqarsartaatsinik misissuisarnerup naleqqussarneqarnissaa sivisunera uggorigaa atuarneqarsinnaavoq. Aamma allakkami ”kommunit kalaallinut eqqarsartaatsimut misissuutit atorneqarnerat unitseqqullugu” ilanngutissallugu neriorsuutigaa.
- Angajoqqaatut piginnaasanik misissuutit atorneqartarunnaarnissaat sulissutigissallugit qalluunaat isumaginninnnermik naalakkersuisuata neriorsuutiaga, taassumalu uannut neriorsuinera imaqarniliami allaqqavoq, meeqqanut, inuusuttunut ilaqutariinnullu naalakkersuisoq Aqqaluaq Biilmann Egede akerliussutsimik takutitsisunut oqarpoq, ministerilu akisussaasoq imaluunniit naalakkersuisoq pitsaasumik ingerlatsisoqanngippat aaqqiisussaavoq.
- Ajortoqartoq isigalugu aaqqiisinnaanngikkaanni politikkikkut akisussaaffimmik naammassinninnginneruvoq, aamma qallunaat isumaginninnermik ministeria qanorluunniit qalipaateqaraluarpat sakkortunerpaamik nunatsinniit qisuariarfigissavarput inuit pisinnaatitaaffiinik ilatsinnillu ataqqinnissuseqanngitsumik iliussappata, Aqqaluaq Biilmann Egede oqarpoq.
Partiip qalipaataa apeqqutaatinnagu ataatsimoorussineq
Inatsisartuni partiit danskit ministeriannik ataatsimeeqateqarnerminni peqatigiiffiit soorlu MAPI, Mentor Immanuel aamma Sila 360, sulianik tamakkuninnga sukataarinnissimasut peqataatinneqarnissaat akerliussutsimik takutitsisut piumasaraat. Aamma partiit qalipaatitik apeqqutaatinnagit ataatsimoorlutik suliami tamatumani ikioqatigeeqquneqarput.
Akerliussutsimik takutitsisut angajoqqaatut piginnaasanik misissuutit taavalu meeqqat angerlarsimaffiup avataanut inissinneqarsimasut angerlarteqqinnissaannut sorsunneq ataatsimut suliassaaneranik oqariartuutaat Atassutip, Naleqqap Demokraatillu isumaqatigaat. Tassani meeqqatta inuunerat pineqarmata partiit avissaartuunnatik ataatsimoorlutik suleqatigiittariaqartut oqariartuutigineqarpoq.
- Inatsisartuni ilaqutariinnermut peqqissutsimullu ataatsimiititaliami ilaasortatut Danmarkimut paasisassarsiorluta angalassaagut, Folketingimilu ataatsimiititaliat pineqartunut tunngasut ataatsimeeqatigissavavut, tassanilu aamma angajoqqaatut piginnaasanik misissuutit atorunnaarsinneqarnissaat piumasarissallugu, Anna Wangenheim (D) oqarpoq.
