KNR-imi qallunaatut radioaviisi tusarnaarneqarsinnaajunnaarneraniit maanna ukiup affaa qaangiuppoq. Kingullermik marsip aappaani 2025-mi aallakaatinneqarpoq, qallunaatullu radioaviisi allakaatinneqaqqissanngikkallartoq KNR aqaguani nalunaarpoq. Taamanikkut aallakaatinneqartarunnaarallartutut nalunaarutigineqarpoq.
Aaqqiissutaagallarneranit maanna ukiup affaa qaangiuttorlu, ilumut aallakaatinneqaqqissanersoq apeqqutinngorpoq. KNR-imi pisortaq Hans Peter Poulsen oqaloqatigaarput:
KNR-imi qallunaatut radioaviisi tusarnaarneqarsinnaajunnaarneraniit maanna ukiup affaa qaangiuppoq. Kingullermik marsip aappaani 2025-mi aallakaatinneqarpoq, qallunaatullu radioaviisi allakaatinneqaqqissanngikkallartoq KNR aqaguani nalunaarpoq. Taamanikkut aallakaatinneqartarunnaarallartutut nalunaarutigineqarpoq.
Aaqqiissutaagallarneranit maanna ukiup affaa qaangiuttorlu, ilumut aallakaatinneqaqqissanersoq apeqqutinngorpoq. KNR-imi pisortaq Hans Peter Poulsen oqaloqatigaarput:
- Suli aalajangerneqanngilaq, oqarpoq.
– Atorfininnissara sioqqullugu qallunaat radioaviisiat unitsinneqarpoq, sulisussaaleqinermullu tunngassuteqarluni. Taama aalajangertoqarnerata nalaanisulli pissutsit maanna atuuttut suli taamaapput.
KNR-imi pisortat taarseraaterujussuarneqareersullu Hans Peter Poulsen maajip aallaqqaataani 2025-mi pisortatut kingulliulluni atorfinitsinneqarpoq. Radioaviisip qallunaatuuata aallakaatinneqartarunnaarneranut KNR-ip tatisimaneqarnera, ingammik tusagassiortut nutaarsiassalerisut amigaataanerat pissutaalluni, pissutaavoq. Tamatuma siuninngua sulisut arlallit sulinerminni atukkatik pillugit sulinerminnik unitsitsipput.
Nittartagaq qallunaatut
KNR-imi suliarineqartartut kiffartuussinissamik isumaqatigiissummi Naalakkersuisunut isumaqatigiissutigineqartartumi aalajangersarneqartarput. Qallunaatit radioaviiseqarnissaa isumaqatigiissut aqqutigalugu pituttugaanngilaq.
Ukiumullu nalunaaquttap-akunneri 313-it qallunaatut imaluunniit takornartat oqaasillit allat atorlugit aallakaatinneqartassasut piumasaqaataavoq, tassalu agguaqatigiissillugu ullormut minutsit 51-it missaat aallakaatinneqartussaallutik.
– 2025-mi qanoq aallakaatitsisoqarsimatiginera suli oqaatigisinnaanngilara, kisianni oqaatsit marluk atorlugit nittartagarput suli tamakkiisumik imaqarpoq, tassanilu nutaarsiassat atuarneqarsinnaapput. Aamma Qanoruumi radioaviisimilu nutaarsiassiissutigineqartut nittartakkatsinniipput, Hans Peter Poulsen oqarpoq.
Qallunaatut radioaviisi nittartakkamit radioaviisillu kalaallisoortaaneersunik imaqarsinnaanera takorloorneqarsinnaava?
- Taamaassinnaavoq, Hans Peter Poulsen oqarpoq.
– Aammali qallunaat radioaviisiat pinnagu ikinnerussuteqartut oqaasii atorlugit aallakaatitsisoqarsinnaanera aamma takorloorneqarsinnaavoq. Nunanit tamalaaneersorpassuit Kalaallit Nunaanni najugaqarput. Nunarsuaq allanngorpoq, nunallu tamalaat imminnut qaninnerulerput. Tamanna KNR-imi aamma peqataaffigissavarput. Tamanna maannakkut sulissutigaarput, qanittukkullu saqqummiukkumaarlugu.
Qanittukkut nutaarsiassiissasut
KNR-ip siulersuisuisa periusissiaq nutaaq aallakaatitsiviit akimorlugit suleriusissaq oqaatsinullu tunngasunik imaqartoq sisamanngornermi septembarip sisamaani oqaluuserissavaat, immaqalu akuersissutigissallugu. Taannalu Hans Peter Poulsenip qilanaaraa. Tamatuma saniatigut innuttaasunut 2024-mi kiffartuussineq pillugu nassuiaat ukiumut saqqummersartoq aamma naammassingajalerpoq.
– Nassuiaat qanittukkut saqqummertussaavoq. Nutserneqarnissaa kisimi amigaataavoq. Sulinermi aaqqusaarsimasavut, ingammik siorna tatineqangaarsimanerput, sammineqarput. Piffissami assoralisimaarsimanerput tupaallaatissaanngilaq, Hans Peter Poulsen oqarpoq.
Nassuiaat apriilimi naammassineqartussatut naatsorsuutigineqaraluarpoq. Assigiinngitsunilli unammilligassaqarneq periusissiornerlu pissutigalugit kinguaattoorfiusimasoq pisortaq nassuiaavoq.
Sulinissamut isumaqatigiissummi piumasaqaatit naammassinissaat ajornakusoorpat, taava politikkerinut isumaqatigiissusioqqinnissamik piumasaqaateqartoqassava?
– Aap, isumaqatigiissut manna atuuttoq 2026 ilanngullugu atuuppoq, allannguiffigerusupparpulli. Neriuppugut isumaqatigiissutinik suliaqartarnitsinnik allannguisoqassasoq, taamaalilluta pitsaassuseq annertussusermit pingaarnerutilersinnaallugu. Tamanna Naalakkersuisunut oqaatiginikuuarput, oqaloqatigeqqikkumaarlutigillu. Neriuppugut politikkikkut Kalaallit Nunaanni tusagassiuutinut maanna piumassuseqartoqarumaartoq.
