Atuarfiit,
meeqqeriviit, meeraaqqeriviit, ulloq unnuarlu paaqqinnittarfiit
napparsimmaviillu sulisussarsiorput, sulisoqarniarnikkullu kalaallit
salliunneqartarput.
Ajornartorsiulli aaqqiiviginiarlugu nunaqavissut
naammanngillat.
Atuarfiit,
meeqqeriviit, meeraaqqeriviit, ulloq unnuarlu paaqqinnittarfiit
napparsimmaviillu sulisussarsiorput, sulisoqarniarnikkullu kalaallit
salliunneqartarput.
Ajornartorsiulli aaqqiiviginiarlugu nunaqavissut
naammanngillat.
Namminersortuni
aamma taamaappoq.
-
Nunanit allanit tikisitat isumalluutigineqaleraluttuinnartut inuit
nalunaarsorsimaffianni takuneqarsinnaavoq, Aningaasaqarnermut
Siunnersuisoqatigiit nalunaarusiaanni kingullermi allassimavoq.
Kommuneqarfik
Sermersuumi politikikkut unammilligassat iliuuseqarfiginiarneqarput –
pingaartumik Nuup avataani. Kommunalbestyrelsip ataatsimiinnerani kingullermi
Mala Høy Kúkop (S) “illoqarfini” Tasiilaq pillugu annertunerusumik
sammisaqarpoq. Oqallinnermut allakkatigut saqqummiussamini eqqaasippaa
illoqarfimmi akerliussutsimik takutitsineq kingulleq aamma ilinniartitsisut
amigaataannut tunngassuteqartoq.
-
Ukiuni siulliunerusuni kalaallit arlaqartut qujanartumik
qinnuteqartarnikuupput. Ukiunilu kingulliunerusuni ajoraluaqisumik malunnarpoq
kalaallit qinnuteqartartut ikiliartortut. Tamanna assut ajuusaarnarpoq. Ukiut
tamaasa ilinniartitsisut nutaat takkuttarput soorunalimi nuannaarutaasaqaat,
Mala Høy Kúko allappoq.
Taanna
naapertorlugu atorfinitsitsinermut tunngatillugu nutaamik
periusissiortoqartariaqarpoq:
-
Ullutsinnullu inuuniarnikkut suut tamarmik akitsornerata kingunerisaanik
suliffissat soqutiginarnerat annikillisimavoq, allappoq.
Qaangiuttoorneq
Sulisunik
nutaanik pissarsiniarluni ”oqitsuinnamik aaqqiisoqarsinnaanngilaq”. IMAK
aasaanerani sulinngiffeqarneq pissutigalugu matoqqavoq, meeqqalli atuarfianni
ukiuni tulliuttuni tallimani atuartitsisut 180-it (taakkunannga
ilinniartitsisutut ilinniarsimasut 143-t) soraarninngornissaat ernummatigalugu
kattuffiup siulittaasuata Elna Heilmannip ukioq manna siusinnerusukkut oqaatigaa.
-
Kalaallit Nunaannut tamarmut kalluaassaaq. Meeqqat atuarfiata ajalusoornissaa
aarleqqutigaara. Skemami inuttassaqanngitsut matussuserniarlugit
ilinniartitsisorpassuit maanna qaangiuttoorlutik sulisarput.
Ilinniartitsisoqarniarneq qiviaraanni meeqqat avinngarusimanerusuniittut
atuartinneqarnissaat eqqarsaatigalugu maanna naligiinngitsumik
inissisimareerput. Assersuutigalugu sumiiffiit ilaanni meeqqat aatsaat 3. - 4.
klassinngoraangamik ilinniarsimasunik ilinniartitsisunit atuartinneqalersarput,
Elna Heilmann sammisaq pillugu marsip qaammataani attaveqarfigigatsinni AG-mut
allappoq.
Atorfiit inuttaqanngitsut
Kommuneqarfik
Sermersuumi Ingerlatsiviup ajornartorsiutit nassuerutigai. Tasiilami ukiumi
atuarfiusumi 2024-25-mi ilinniartitsisut ilinniarsimasut 33-usut, timelærit
15-it atorfiillu inuttalerneqanngitsut 14-it Mala Høy Kukop siunnersuutaanut
ingerlatsiviup oqaaseqaataani atuarneqarsinnaavoq.
-
Pisariaqartitsineq matussuserniarlugu ilinniartitsisorpassuit qaangiuttoorlutik
sulisarlutillu atuuffiit arlallit mininneqartarput, perorsaanikkut suliassat
atuartut skemaannut sunniuteqanngikkaluarlutik tamakkiisumik atuarfiup
pitsaassusaanut sunniuteqaqataasartut, ingerlatsivik allappoq.
-
Sulisussarsiornermi kingullermi Kalaallit Nunaannit qinnuteqartoqanngilaq,
tamannalu Tasiilami sulinissamut soqutiginninnerulersitsisinnaasunik
suliniuteqartoqartariaqarneranik naqissusiivoq – suliffeqarnikkut periarfissat
sumiiffimmilu inuuniarnikkut atugassarititaasut ilaatigut ersersinnerisigut,
nassuiaammi erseqqissarneqarpoq.
Oqilisaassinissaq pisariaqartoq
Ullukkut
paaqqinnittarfinni ulloq unnuarlu paaqqinnittarfinni sulisoqarniarneq aamma
unammilligassaavoq. Ulluunerani paaqqinnittarfinni sulisunut
oqilisaassisoqartarnissaanut 1,5 millionit koruunit
aningaasaliissutigineqassasoq Siumut sinnerlugu kommunalbestyrelsimut
ilaasortap Doris J. Jensenip siunnersuutigaa.
-
Sulisoqarnikkut ajornartorsiutit annertupput aamma taamaappoq ilaatigut
kommuunitta nunaqarfiini assersuutigalugu sulisoq ataasiinnaasinnaasarpoq
unillatsiarnissaminut periarfissaqarani. Taamaattumik siunnersuutigaara,
atugassarititaasunik oqilisaasoqassasoq, aalajangiiffigisassatut
siunnersuummini allappoq.
Meeqqanut
ingerlatsivik tassunga aamma oqaaseqaateqarpoq. Sulisut tapersersorniarlugit
suut suliniutigineqarnersut ilaatigut paasissutissiissutigineqarluni.
-
Nunaqarfinni ulluunerani neqeroorutigineqartuni tamani ikinnerpaamik sulisut
marluunissaat qulakkeerniarlugu atorfiit inuttassarsiuunneqarput. Naak sulisut
aamma marluugaluartut ilaatigut pisoqartarpoq sulisut kisimiittarnerannik
napparsimasoqartillugu allatulluunniit sulinnginnermut tunngasumik
pisoqartillugu, amerlasuutigut nunaqarfinni taartaasinnaasunik
pissarsiniartarneq ajornakusoortarmat, Ingerlatsivik Doris Jensenip sulinermi
atugassarititaasut pitsanngorsaaviginissaanut kissaateqarneranut akissuteqarluni
ilaatigut allappoq.
-
Nunaqarfinni sulisut akornanni ilinniarsimasuunerup pitsaanerulersinnissaa
aamma sulianut tunngasunut pisariaqarpoq. Tamannali unammilligassanik
annikitsunik arlalinnik pilersitsivoq, isummerfigissallugit pingaaruteqartunik:
Ilinniarneq sumi ingerlanneqassava, qaqugukkut ingerlanneqassava, kina
meeqqanik ilinniarnerup nalaani paarsissava – meeqqat sulisup paarisai
namminerlu meeqqani? Ingerlatsivik allappoq.
Ilungersunartoq
Nunami
ulloq unnuarlu paaqqinnittarfinni sulisoqarniarneq aamma ajornartorsiutaavoq.
Ulloq unnuarlu paaqqinnittarfiit aamma
ulloq unnuarlu neqeroorutit ukiumoortumik nalunaarutaat 2024-mi
saqqummeqqammertumi tamanna allaaserineqarpoq.
-
Ulloq unnuarlu paaqqinnittarfiit aamma ulloq unnuarlu neqeroorutit ilarpassuini
sulisunik
taarseraannerujussuaqarneranik
sulisunillu ilinniarsimasunik amigaateqarneq pillugu
ilungersunartorsiuuteqarlutik nalunaarsuipput, ukiumoortumik nalunaarummi
allassimavoq.
Piginnaasanik
ineriartortitsisoqarsinnaanera aaqqiissutissap ilagisinnaagaa eqqaaneqarpoq:
- Sulisut akornanni
ilinniarsimannginneq ilisimasakinnerlu pissutaallutik sulinermi suliassat
oqimaallisarneri akuttunngitsumik kingunerisarpaa, taamaalilluni sulisut
annertuumik taarseraannerannik kinguneqalersarpoq. Taamaammat sapinngisamik
sulisut amerlanerpaat pikkorissaanernut piginnaasanik ineriartortitsiffiusunut
peqataasarnissaat ulloq unnuarlu neqeroorutinut pingaaruteqarpoq, ukiumoortumik
nalunaarummi allassimavoq.
