Qaqortoq ukiut 250-inngortorsiorlugit ataasinngorpat nalliuttorsiussasoq

Qaqortup ukiuni 250-ini illoqarfiusimanera apriilip arfineq-aappaanni 2025-mi nalliuttorsiutigineqassaaq.

Soorunami ilaatigut oqalugiartoqarneratigut, naalagiaqatigiinnikkut kaffillernikkullu nalliuttorsiutigineqassaaq.

Tamanna nalliuttorsiornissamut pilersaarummi, Kommune Kujalliup nittartagaaniittumi atuarneqarsinnaavoq.

Ulloq aallarnerlugu nalunaaqutaq 08.30 kommunip erfalasulerfiani erfalasoq amuneqassaaq, tassanilu nalliuttorsiornermut ataatsimiititaliami siulittaasoq Georg Olsen oqalugiassalluni.

Tamatuma kingorna oqaluffimmut ingerlaaqatigiittoqassaaq, tassanilu naalagiaqatigiittoqassalluni.

Nalunaaqutaq 10.15 eqqaassutissaq nutaaq politeeqarfiup akianiittoq uleerneqassaaq, tamatumalu kingorna katersortarfimmi kikkunnut tamanut kaffillertoqassalluni.

Ualikkut kaffillertoqarlunilu meeqqanut inuusuttuaqqanullu aliikkusersuisoqarlunilu, pisseqattaartoqassaaq nipilersortoqarlunilu. Tamakku saniatigut tamussiussassaqassaaq.

Nalunaaqutaq 19.00 ilaqutariit tamarmik kaffisoriartoqataallutillu aaqqissuussinermut peqataasinnaapput, tassani borgmesteriugallartoq Stine Egede oqalugiassaaq, aliikkusersuisoqassalluni aamma kaffillertoqarlunilu, tiillertoqarlunilu kaagillertoqassalluni.

Pilersaarut tamaat uani takusinnaavat.