Qaqortumi palasi nutaaq
Parma Andersen Qaqortumi palasinngortinneqarpoq.
Parma Andersen (saamiatungaani) Qaqortumi palasitut sapaatiummat ivertinneqarpoq.
Assiliisoq: Poul Hard
Sapaatiummat Qaqortumi Gertrud Raskip oqaluffiani Parma Andersen palasitut nutaatut ivertinneqarmat, provsti Juaanna Platou najuuppoq.
Qaqortormiorpassuit ivertinneqarneq isiginnaarpaat, Parma Andersenilu oqaluttuarpoq 2013-imi Kangaatsiami palasinngorsimalluni, tassanilu ukiuni tallimani palasiusimalluni.
Tamatuma kingorna ukiuni taama amerlatigisuni aamma Maniitsup Palaseqarfiani palasiuvoq. Parma Andersen anaanani napparsimanerminik toqujartormat, siorna aggustimi Qaqortumut tikippoq.
Arnaa ukiup matuma aallartinnerani toqukkut qimaguppoq, Parma Andersenilu aliasoreerluni palasitut paarlattaasunngorpoq, maajillu tallimaanni Qaqortumi palasitut atorfinitsinneqarluni.
Ilagiit siulittaasuat Anthon Joseassen naapertorlugu Parma Andersenip atorfinitsinneqarnera pisariaqartinneqarpoq, tassami palasiusimasoq tunuarmat provsti Juaanna Platou piffissap ilaani kisimi palasitut kiffartorsimavoq.
Parma Andersen Gertrud Raskip oqaluffiani ivertinneqarpoq.
Poul Hard
