Qeqertani timmissat immikkuullarissut ulorianartorsiorput: – Timmiaaruppat uteqqinnissaat nalunarpoq
Qeqertarsuup Tunuaniittumi Kitsissunnguini terianniat amerliartornerat timmissat assigiinngitsorpassuit najugarisaasa navianartorsiornerannik kinguneqarpoq.
Kitsissunnguit nunarsuarmi imeqqutaalaqarfiit annerpaasa ilagisimavaat. Maannali ukiulli 20-t matuma siornarnit pingajorarterutaannaat tassani manniliortarput.
Assi: Johnny Madsen/Biofoto/Ritzau Scanpix
Qeqertat Kitsissunnguit, Qeqertarsuup Tunuata kujataatungaaniittut, timmissat immikkuullarissumik najugaqarfigaat. Timmissalli ikileriarsimapput.
Pinngortitaleriffiup nalunaarusiaani nutaami tamanna erseqqissarneqarpoq.
Kitsissunnguit nunarsuarmi imeqqutaallat manniliortarfiattut annerpaajusimavoq, sulilu amerlasuut tassaniiillutik.
Ukiulli 20-t matuma siornatigut amerlassusaanniit maanna pingajorarterutaannanngorsimapput, tamannalu timmissanut allanut taakkua manniliortarfiisa qanitaanniittunut kinguneqarsinnaavoq.
- Imeqqutaallat timmissanut allanut pingaaruteqartuupput, taakkumi imeqqutaalaqarfimmut illersuisartuupput. Imeqqutaallat najugaqarfimmut illersuillaqqissuuppput. Tamannalu timmissat allat aamma iluaqutigisarpaat.
- Imeqqutaallat ikileriarnerat uumasunut allanut sunniuteqarsinnaavoq, Pinngortitaleriffimmi miluumasunut timmissanullu immikkoortortami ilisimatusartoq Aili Lage Labansen oqarpoq.
Uumassusillit assigiinngisitaarnerannut annaasaqaataasoq
Imeqqutaallit Kitsissuinnguini timmissani kisiartaanngillat. Qeqertani timmissat assigiinngitsut 52-it nalunaarsorneqarsimapput, taakkunanngalu 27-t tassani manniliortarlutik.
Qeqertani timmissat allat arlallit aamma ikiliartortut siunissamilu qaninnerusumi nungulluinnarnissaat ilimanartoq nalunaarusiami allassimavoq.
Tamanna uumassusillit assigiinngisitaarnerat eqqarsaatigalugu annaasaqaataassasoq Aili Lage Labansen nassuiaavoq.
- Kitsissunnguit immikkuullarissutut oqaatigineqarsinnaavoq, tassami uumasut assigiinngitsorpassuit tassani najugaqarmata, aamma nunarsuarmi imeqqutaalaqarfiunerpaanikuulluni. Taamaattumik najugaqarfik timmissanut immikkuullarissuuvoq.
- Timmiaaruppat najugaqarfigineqaqqilersinnaanissaa nalunarpoq.
Terianniat timmissat navianartorsiortippaat
Timmissalliuku ikiliartornerannut suna pissutaasoq?
Timmissat ikiliartornermut qeqertani terianniat amerliartornerat pissutaanerpaasoq nalunaarusiami inerniliunneqarpoq. Terianniat amerlassusaat ukiuni 20-ni kingullerni amerleriapiloorsimapput.
Nalunaarusiaq naapertorlugu qeqertani inuit terianniat akiornissaannut piginnaanillit ikilisimanerat pissutaasinnaavoq.
Kitsissunnguit 2008-mi eqqissisimatitanngormat tikinneqarsinnaaneranut killilersuutit sukannernerulerput, ukiunilu tulliuttuni terianniat siammarsimapput qeqertanilu taakkunani najugaqarlutik.
Aasaanerani qeqertani inuk ataaseq najuutissasoq, taamaalillunilu terianniat ikilisarniarlugit iliuuseqartoqarsinnaasoq Pinngortitaleriffiup innersuussutigisimavaa.
Sooq qeqertani timmissat terianniat amerlassusiannit pingaaruteqarnerua?
- Qeqertani timmissat immikkuullarissuupput. Terianniallu nunap sinneraniipput. Terianniat nungutinneqarnissamik navianartorsiunngillat, Aili Lage Labansen oqarpoq.
