Qeqertarsuarmi Peqqissaavimmi pissutsit ernumanartut

15. septemberi aallarnerfigalugu Qeqertarsuarmi Peqqissaaviup ingerlanneqarnera annertuumik allannguuteqarpoq, tamannalu peqqissaavimmi sulisunik innuttaasunillu ernumalersitsivoq.

Qeqertarsuarmi Peqqissaavimmi peqqissaasuunerugallartup Bea Jerimiassenip oqarnera naapertorlugu, pissutsit ilungersunartorujussuarmik minnerunngitsumillu ernumanartumik maannakkut inissisimapput.

Allannguisoqarnissaalu sioqqullugu tusarniaaffigineqarsimanatik, taassuma oqaatigaa.

Portørit amigaataasut

Qeqertarsuup Peqqissaavianiik angalasut soorlu napinikut, pitsorluttut, utoqqaat allatulluunniit ikiorneqaratik namminneerlutik angalasinnaanngitsut ambulancit atorlugit suli angallanneqarsinnaasut, tamannalu napparsimasup bilitsissaanik inniminniinermut atatillugu naliliivigineqartartoq, Kalaallit Nunaani Peqqinnissaqarfik paasissutissiivoq.

Kisiannili Qeqertarsuup Peqqissaaviani portørit amigaataasut, peqqissaasuunerugallartoq Bea Jerimiassen oqarpoq.

- Qeqertarsuup Peqqissaaviani portøri ataasiinnaavoq. Pinartoqavissorpat peqqissaaviup ammanerani ambulancinik aallertoqarsinnaavoq, ammasarfiilli avataatigut portøri sulineq ajormat napparsimasunik aallernissaq ajornakusuussaaq.

- Portørit ataatsimik amerlineqarnissaat kissaatigisarsimagaluarparput, kisiannili tamanna pisinnaanngitsoq paasitinneqartarpugut, taanna oqarpoq.

Peqqissaaviup ammasarfiisa naliginnaasut avataatigut ambulancinik ingerlatitsisussamik pissarsiniarneq ajornakusoortorujussuusoq, taassuma erseqqissaatigaa.

Peqqissaavimmi uninngasoqassaartoq

Qeqertarsuup Peqqissaaviani napparsimasunik uninngatitsisarneq aamma unitsinneqartoq, peqqissaasuunerugallartoq paasissutissiivoq.

- Ajoraluartumik maani peqqissaavimmi uninngatitsisarneq unitsinneqarpoq. Soorunami pisariaqavippat peqqissaavimmi uninngasoqarsinnaavoq, kisianni peqqissaavik sisamanut matusalermat ulloq taanna anisariaqassaaq.

- Assersuutigalugu peruluttut piartortulluunniit ullunili amerlanerusuni uninngasariaqalissappata allatut ajornartumik Aasianni Peqqissaavimmut ingerlateqqinneqartariaqalerput, tamaaliorusunngikkunillu namminneerlutik angerlarsimaffimminni uninnganissartik toqqarsinnaalerpaat.

- Angerlarsimaffimminnilu uninngassappata peqqissaaviup ammanerata nalaani sulisuniit alakkallattaarneqarsinnaasut paasitinneqarpugut, Bea Jerimiassen oqarpoq.

Qeqertarsuarmi Peqqissaaviup nalunaaqutaq 8.00-imiik 16.00-ip tungaanut ammasarfiisa naliginnaasut avaataatigut sillimasuutitanik unnukkorsiortoqarlunilu unnuarsiortoqatarnera atorunnaarsinneqarpoq. Kisiannili sillimasuutitat ulluinnarni sapaatillu akunnerisa naanerini peqqissaavimmiinnatik angerlarsimaffimminni sillimasuusasassasut, peqqissaasuunerugallartoq oqarpoq. Pinartoqartillugu sillimasuutitat aggersarneqarsinnaasut Kalaallit Nunaani Peqqinnissaqarfik paasissutissiivoq.

Aasiannut saaffiginnittoqartassasoq

Qeqertarsuarmi Peqqissaaviup ammasarfiisa naliginnaasut avataatigut qangali pissusiusoq malillugu Aasianni Peqqissaavimmut saaffiginnittoqartassaaq.

Bea Jerimiassenip oqarnera naapertorlugu Aasianni Peqqissaavimmut saaffiginnissutit nalilersorneqartarput, tassanngaanniillu suliaq nalilersorneqarlunilu ingerlanneqartarpoq.

Qeqertarsuarmi Peqqissaavik 13-inik sulisoqarpoq, taakkua saniatigut nakorsaq ataaseq peqqissaasullu vikarit tikisinneqartarput. Pissutsilli maannakkutut itsillugit nakorsat peqqissaasullu vikaritut tikittartut Qeqertarsuarmut suliartornissartik eqqarsarnartoqartilereeraat, peqqissaasuunerugallartoq oqarpoq. Qeqertarsuup Peqqissaaviani peqqissaasut aaliangersimasumik atorfillit pingasunngussasut, taassuma erseqqissaatigaa.

Borgmesteri sakkortuumik isornartorsiusoq

Qeqertarsuarmi Peqqissaavimmi pissutsit maannakkut atuuttut pillugut Kommune Qeqertalimmi borgmesteri Simigaq Heilmann, Demokraatit, tusagassiuutinut nalunaaruteqarluni parteeqatini Peqqissutsimut Inunnullu Innarluutilinnut Naalakkersuisoq Anna Wangenheim sakkortuumik isornartorsiorpaa piaartumillu iliuuseqartoqarnissaa, taassuma piumasaaraa.