Qeqertarsuup Tunuani nipit tusaakkit
Issittumi uumasunik soqutigisallit maanna immami inuunermi nipinik immikkuullarissunik tusarnaarnissaminnut periarfissaqalerput. Ilulissat qanngorpallannerat, umiarsuit ingerlaarnerat, aammalumi arferit puisillu imminnut attaveqarfiginiarlutik sorlumminnik nipiliortitsinerat, uinngilanerat nipiliornerallu tusaaneqarsinnaanngorput.
Etableringen af lyden, hvor en mikrofon blev placeret i havets bund.
Christian Klindt Sølbæk
Illoqarfiup qanoq nipeqarnera ajornanngitsuaqqamik tusaareqarsinnaavoq. Immamili aamma susoqarnersoq maanna tusaaneqarsinnaanngorpoq.
Qeqertarsuarmi Qaqqaliami immaqami nipinik siammarterussutaasoq atuleqqammerpoq - Innuttaasut maanna immarmi susoqarnersoq tusarnaarsinnaanerpaat, Pinngortitaleriffik nalunaarpoq:
- Imaq Qeqertarsuup eqqaaniittoq niperpassuaqartarpoq. Ilulissat qanngorpallannerat, umiarsuit ingerlaarnerat, aammalumi arferit puisillu imminnut attaveqarfiginiarlutik, sorlumminnik nipiliortitsinerat, uinngilanerat, nipiliornerallu tusaaneqarsinnaagamik.
- Massakkoqqissaarlu arfiviit qimagutinnginnerminni erinnersaarneri kingulliit maajip ingerlanerani tusaaneqarsinnaapput. Ussuit angutiviat uinngialanerat immaqaluunniit qilalukkat qaqortat qernertalluunniit avannamukaarlutik qimagutitsinnatik nipiliorneri iluatsitsilluassagaanni tusaaneqarsinnaasussaapput. Juunimi qipoqqaat, tikaagulliusaat tikaagulliillu takkuppata taakkua imaani tusaaneqarsinnaanngortussaassapput.
Ulloq unnuarlu nipinik immiussineq
Pinngortitaleriffik naapertorlugu nipinik siammarteriffiup immami mikrofonimik attavilerneqarsimaneratigut Qeqertarsuup Tunuani immami nipit ukioq kaajallallugu ulloq unnuarlu siammartertuartussaavai.
Nipit siammerterneqaannaratik aamma toqqortorneqartussaassapput, ukiut ingerlanerini imaani miluumasut nipaasa allannguuteqarnerat inuillu pilersitaannik nipiliornerit qanoq annertutigilersimanerat takussutissaqarsinnaaniassammata.
- Qeqertarsuup Tunua nunatta kitaaniittoq issittumi immikkuullarissuseqarpoq uumasut assigiinngiiaartorpassuit tamaani uumasaramik. Tassa issittup uumasui atlantikullu imartaata uumasui piffissani assigiinngiiaartuni tamaani uumasaramik. Assersuutigalugu arfiviit pingaaruteqarluinnartumik Qeqertarsuup Tunua katersuuffigisarpaat. Arfiviimmi 500-it 1.000-llu akornganni amerlassuseqartut januaarimiit juunimut ukiut tamaviisa tamaani uumasaramik.
Suliniut nipinik siammarterinissamut tunngasoq Qeqertarsuup illoqarfia, Arktisk Stationi, naalagaaffimmi Statens Naturhistoriske Museum, Visit Greenland aammalu Pinngortitaleriffik suleqatigiinnerisugut piviusunngorsinnaasimavoq.
Kronprins Frederiup aammalu Kronprincesse Maryp aningaasaateqarniannit, Carlsberg Foundationimit, Aage V. Jensenip Charity foundationimik aammalu Hotel Disko Islandimit suliniut aningaasaliiffigineqarsimavoq.
Uani nipit tusarnaarneqarsinnaapput: www.diskolive.com.
