Qeqqata Kommunia kangiamiunik tikisitsilerpoq
Qeqqata Kommuniani sulisussaaleqineq iliuuseqarfiginiarlugu kangiamiunik qulinik tikisitsilerpoq, taakku meeqqerivimmi utoqqaallu angerlarsimaffianni sulissapput. Taakkunani tallimat Maniitsumi utoqqaat angerlarsimaffianni sulilersinneqassapput, tallimallu Sisimiuni meeqqerivimmi Uiami sulilersinneqassallutik.
Foto: Dorthea Reimer-Johansen
Angajoqqaat meeqqeriviliaassigaangamik sulisunut kalaaliusunut meeqqatik tunniutissallugit sungiusimaannannguatsiarpaat.
Tamannali allaanerulissaaq - Qeqqata Kommuniani.
Angajoqqaat meeqqallu meeqqanukarunik kiinnat nutaat takussavaat - kangiamiummi meeqqat ulluinnarni peqatigisalissavaat.
Taassuma saniatigut Maniitsumi utoqqaat angerlarsimaffianni aamma kiinnat nutaat sulisut akornanni takussaajumaarput. Utoqqaallu ullaakkut itertalerumaarput nipit allamiorpalaartut tusaanerisigut.
Qeqqata Kommuniami nunanit allanit tikisitsillutik sulilersitsiniarput. Qeqqata Kommunianimi sulisussaaleqineq ajornartorsiutaavoq:
- Ukiuni arlalinngortuni inuleriffinni sulisussanik annertuumik amigaateqarneq ajornartorsiutigivarput, kikkullu tamarmik sulisussameermata sulisinnaasunik allamik aallarfissaqarata. Sulilertoqartaraluarpoq piffissalli sivikitsup ingerlanerani tammaqqittarlutik.
- Tamanna pissutigalugu allatut ajornartumik kangiamiunik tikisitsinissarput aallaqqaammut Maniitsumi utoqqaat angerlarsimaffiannut tallimat Sisimiunilu Meeqqerivik Uiaq-mut aamma tallimat tikisinnissaat siunniupparput Qeqqata Kommuniani borgmesteri Malik Berthelsen (S) Sermitsiamut oqarpoq.
- Sulisugut suliartortuaannartut illersorusuppagut
Borgmesterip oqaasii naapertorlugit sulisut aalajaatsut sulisut amigartuarnerat pissutigalugu ulaperulutsinneqartuarnerat aammalu meeqqat utoqqaallu naammattumik piffissaqarfigineqartannginnerat illersorneqarsinnaanngitsoq, taamaattumik avataaniit tikisitsinissaq avaqqunneqarsinnaannginnerarpaa:
- Sulisugut amigartuarnitik pissutigalugit ulaperulutsinneqartuarnerat aammalu meeqqat utoqqaallu naammattumik piffissaqarfigineqartannginnerat soorunami illersorneqarsinnaanngilaq, taamaattumik avataaniit tikisitsinissaq avaqqunneqarsinnaanngilaq.
- Taamaasiunngikkuttami ernumassutigivarput sulisugut suliartortuaannartut nukissaarunnissaat, taamaattumik sulisutta aamma illersorneqarnissaat eqqarsaatigisariaqarparput, Malik Berthelsen oqarpoq.
Suliassat
Borgmesteri Malik Berthelsen Sermitsiamut oqaluttuarpoq kangiamiut ikiortitut, soorlu nerisitsinermi, aneeruussinnermi nangilersuinermiluunniit atorneqarnissaat siunertaasoq.
- Erseqqissaatigissavarpullu tikittussat soorunami meeqqerivimmi inimi ataatsimi ataatsimoortinnagit ininut agguarlugit tamarmik nunaqavissunik suleqatilerlugit agguarneqassammata. Suliassallu allat nalinginnissaasut angajoqqaanillu attaveqarnerit nunaqavissuniit pisarnertuut akisussaaffigineqassapput.
Avataaniit tikisinneqartussat inulerinermik misilittagqarsimanissaat piumasaqaatigalugu, borgmesterip erseqqissarpaa.
Oqaatsitsinnillu ilikkarnissaat sulissutigineqassasoq ilanngullugu oqaatigalugu.
- Oqaatsitsinnik ilikkarnissaat soorunami sulissutigineqassaaq, kangiamiullu nunatsinni sulisut oqaatsitsinnik sukkasuumik ilikkartarmata isumalluarpugut ilikkapallannissaannut.
Nunarput perorsaasunik 470-inik amigaateqarpoq
Nunatsinni Perorsaasut Kattuffiata ukiumoortumik nalunaarusiaani atuarneqarsinnaavoq nunatsinni ulloq unnuarlu angerlarsimaffinni ulluinnarnilu paaqqinnittarfinni perorsaasut 470-it amigaatraasut.
- Oqaatigeqqissavara sulisussanik allanik nassaassaqanngilagut pissutigalugu inunnik sulisinnaasunik amigaateqaratta. Tikittussanut qilanaarpugut isumalluarlutalu suleqatigiligassaannut ilaqutaasunullu annertuumik iluaqutaanissaannut, Malik Berthelsen Qeqqata Kommuniani borgmesteriusoq naggasiivoq.
