Qeqqata Kommunia perorsaasunik 44-inik amigaateqarpoq
Qeqqata Kommunia Sisimiuni Maniitsumilu meeqqerivinni sulisussaqarniarnikkut ajornartorsiuteqarpoq. Kommuni meeqqerivimmi sulisunik katillugit 77-inik amigaateqarpoq, taakkunani 44-ut perorsaasutut ilinniagallit amigaatigineqarlutik. Sulisussaaleqineq pitsanngorsaaviginiarlugu upalungaarsimanerlu aallaavigalugu kommuni iliuusissamik siunnersuuteqarpoq, taannalu kommunalbestyrelsimi ullumi sisamanngornermi oqaluuserineqassaaq.
Taseralik
Meeqqat meeqqeriviup silataani aneerput, aneernerulli nuannersup avataani pissutsit ajornarput.
Kommunimi perorsaasunik sulisunillu allanik amigaateqangaatsiarpoq, sulisut meeqqallu upalungaarsimanissaat eqqarsaatigalugu kommuni iliuuseqartariaqalerluni.
Nunaqarfinni illoqarfinnilu meeqqerivinni arlalinni perorsaasunik ilinniarsimasunik sulisoqanngilaq. Qeqqata Kommuniani kisitsisit takutippaat Sisimiuni Maniitsumi nunaqarfiinilu sulisunik 77-inik amigaateqartoqartoq, tassani perorsaasut, ikiortit eqqiaasullu amigaataallutik.
Kisitsisit aamma takutippaat kommunimi tamani perorsaasut ilinniarsimasut 44-ut amigaataasut.
Ajornartorsiut qaangerniarlugu kommuni iliuusissanik arlalinnik siunnersuuteqarpoq, ilaatigut meeqqeriviit allat attaveqatigineratigut sulisussarsiorneq, allaffissuarmiit ataqatigiissaarineq kiisalu sulisussarsiorneq iluatsinngikkaangat angajoqqaat suleqatigalugit meeqqanik angerlartitsineq.
Inissat allanngortinneqassasut
Kommunimit siunnersuut aamma imaqarpoq sulisunik amigartilluni inikkaartut amerlassusaasa allanngortinneqarnissaat. Maannamut sulisut pingasut meeraaqqat aqqaneq-marluk imaluunniit meeqqat anginerulaat 20-it isumagisarpaat. Sulisunik amigartoqartillugu sulisut marluk meeraaqqat qulit, meeqqalluunniit anginerulaat 14-it isumagisalissagaat siunnersuutaavoq.
Sisimiuni Maniitsumilu meeqqerivinni sulisussaalerinermi iliuusissamik siunnersuut Qeqqata Kommuniani kommunalbestyrelsip ataatsimiinnerani ullumi sisamanngornermi oqaluuserineqassaaq.
