Qeqqata Kommunia sinneqartoorfiusumik missingersuusiorpoq

Qeqqata Kommuniani kommunalbestyrelsi ukiuni sisamani tullittuni 16,6 millionit koruuninik sinneqartooruteqartarnissaq naatsorsuutigaa.

2025-mut ukiunullu tulliuttunut missingersuutit kommunalbestyrelsip sisamanngornermi ataatsimiinerani partiinit tamanit attaviitsumiillu taperserneqarluni akuersissutigineqarpoq. Kommunalbestyrelsemi ilaasortaq Karl Lyberth kisimi itigartitsisuulluni akuersinngilaq.

Missingersuut nutaanik suliniutinik malitseqassasoq, Borgmesteri Malik Berthelsen (S) oqarpoq:

- Ukiut siulii eqqarsaatigalugit ingerlatsinermut aningaasartuutigut qaffakkiartorsimaneri pissutigalugit suliniutinut nutaanut akissaqarnikuusimanngilagut. Taamaammat massakkut akileraarutitigut isertittakkagut qaffakkiartorneri pissutigalugit suliniutinik nutaanut akissaqarnerput soorunami iluarisimaarparput, borgmesteri Malik Berthelsen Sermitsiamut oqarpoq.

Tamatuma malitsigaa Qeqqata Kommuniani innuttaasut akileraartarnerat allanguuteqarani 26%-imiiginnassasoq, nunalu tamakkerlugu akileraarut ilanngukkaanni 42%-miissalluni. Meeqqerivinnut, eqqaaveqarnermut anartarfilerinermullu akigititat allannguuteqaratik aamma taamaaginnassapput.

Ukiuni tulliuttuni suliniutissat

Missingersuummi suliniutit makku ilanngunneqarput:

• Sisimiuni Maniitsumilu naluttarfissat:  Suliniummut aningaasanik 10 millionit koruuninik immikkoortitsisoqarpoq, missingersuutit 20 millionit koruuninngortinneqarlutik.
• Inissianik sanaartorneq:  Sisimiuni kommunimi sulisunut inissialiortoqassaaq, ilanngullugu puigortunngortunut angerlarsimaffimmik aamma sanasoqassaaq, kiisalu kalaalimineerniarfimmik nutaamik sanasoqassalluni. Maniitsumi sisorartarfik inarsarneqassaaq.
• Nutarsaaneq ineriartortitsinerlu:  Kangaamiuni atuarfik nutarsarneqassaaq, Sarfannguani multihusip naammassiniarneqarpoq.  Umiatsiaaqqeriviullu eqqaata pitsanngorsarneqarnissaa ilanngullugu aningaasaliivigineqarluni. Atuarfik Kilaaseeraq aamma nutarsarneqaleruttorpoq.  Atammimmilu illu sullivik aningaasaliivigineqarluni.

Maniitsumi atuarfiup nutarsarneqarnissaanut annertuumik aningaasaliisoqareermat Sisimiut inerisarneqarnissaanut aningaasanik atuisoqassaaq.

- Isumaqatigiinnikuuvugut aappaagu taavalu ukiuni tulliuttuni massakkut aningaasaliissutigut annertunerusumik Sisimiunut tunngassuteqassasut.

- Taamaammat tassa aalajangernikuuvugut Sisimiuni sulisunut inissialiorniarluta, taavalu taassuma saniatigut aamma kalaalimineerniarfik nutaamik taarsernissaa taavalu aamma kingusinnerusukkut puigortunngortunut angerlarsimaffimmi nutaamik sananissaq, kisianni Inatsisartunut affai qinnutigeqqaartussaassavagut. Akuersissutigineqarpatalu aatsaat suliaq aallartissinnaanngussalluni. 

- Ukiut siuliini aningaasaliissutigeriikkagut eqqarsaatigalugit inoqarfinni amerlanerpaani qujanartumik suliassaqartitsivugut. Maniitsumi Atuarfik Kilaaseeqqap aallartinnissaa eqqarsaatigalugu qujanartumik aamma Maniitsumi annertuumik suliassaqartitsisussaagami. Taamaammat aalajangerpugut Sisimiuni sanaartornernut annertuumik aningaasaliisariaqartugut.