Qeqqata Kommunia: Sunoorsit e-cigarettillu sulinerup nalaani aamma inerteqqutaalerput
Qeqqata Kommuniani sulisut maanna sulinerminni sunoorsitoqqusaajunnaarlutillu e-cigaretsitoqqusaajunaarput. Qeqqata Kommuniani kommunalbestyrelsi sisamanngornermi septembarip 26-ani ataatsimiinnermi pujortartarnermut politikki allanngorneqassasoq isumaqatigiissutigaat, tassani nikotinilinnik atuinermut sunoorsit e-cigaretsillu inerteqqutitut ilanngunneqarlutik. Suleqatigiit isumaqataallutik akuersipput, illuatingiliuttullu isumaqataanatik akerliullutik.
Qeqqata Kommuniani sulisut sulinermi nalaani pujortaqqusaanngillat, maanna sunoorsitoqqusaajunnaarlutillu e-cigaritsitoqqusaajunnarput.
Leiff Josefsen
Qeqqata Kommuniani suliffinni sulinerup nalaani taamaallaat cigaritsinik pujortarneq siullermik inerteqqutaavoq.
Manna sunoorsitorneq, e-cigaritsitorneq nikotinilinnillu allanik atuineq aamma inerteqqutaalerpoq.
Taama Qeqqata Kommuniani kommunalbestyrelsimi suleqatigiit, Siumut, Inuit Ataqatigiit Atassullu sisamanngornermi septembarip 26-ani isumaqatigiillutik akuersipput.
- Nappaavunga meeqqat pillugit, Navarana Lennert-Andersen IA-meersoq taasinermi nappaajutigaluni oqarpoq. Tassani Siumut aamma Atassut aamma akuersillutik nappaapput.
Naleqqami ilaasortat nappaanngillat.
Pujortarneq meeqqanut inuusuttuaqqanullu takussaajunnaarli
Pujortartarneq meeqqanut inuusuttuaqqanullu takussaajunnaarnissaa kommunimi anguniakkat ilagaat. Kommunalbestyrelsi 2021-imi novembarimi aalajangerput kommunini suliffiit tamarmik pujortarfiussanngitsut, inatsilu maajip aammaqqaataani 2022-imi atuutilersinneqarpoq.
Pujortarneq nuannaartunassanngilaq
Naak peqqinnissamut iliuutsit arlaqaraluartut atuarfimmi ukioq manna misissuisitsinerup takutippaa atuartut akornanni nikotininik atuinerit qaffakkiartortut.
HBSC-mi meeqqanik atuartunik misissuinerup kingulliup 2024-mi ingerlanneqartup takutippaa Qeqqata Kommuniani 7.-8. klassimi atuartut quliuppata marluk aamma 9.-10. klassini atuartut quliuppata tallimat nikotinitalinnik atuisuusimasut.
Ullut 30-t iluanni meeqqat atuartut akornanni sunoorsinik atuisut 9. - 10. klassimi atuartut quliuppata sisamat
- 7. - 8. klassimi atuartut quliuppata marluupput.
Ullut 30-t iluanni meeqqat atuartut akornanni e-cigaretsinik atuisut 9. - 10. klassimi atuartut quliuppata marluk - 7. - 8. klassimi atuartut quliuppata marluupput.
- Ineriartorneq taama ingerlaannassapat soorunami ernumanarpoq, taamaattumik politikkikkikkut iliuuseqarfigisariaqarparput, tupat sunoorsillu nuannaartunarunnaartinnissaanut, borgmesteri Malik Berthelsen siunnersuut saqqummiukkamiuk oqarpoq.
Pujortarunnaarnissamut pikkorissaanerit
Nikotinillit tamarmik Qeqqata Kommuniata suliffiini inerteqqutaalerput, tamanna isumaqarpoq kommuni pujortarunnaarnissamut pikkorissaarnernut aningaasanik atuinerusariaqassasoq.
Kommunimi 2022-imi sulinerup nalaani pujortaqqusiunnaarnerup kingorna Qeqqata Kommunia pujortarunnaarnissamut pikkorissaanerit aalluppai. Pujortarunnaarnissamullu pikkorissaasut arlalinngornikuullutik.
Pujortarunnaartut arlaqalersimasut, siunnersuummi oqaatigineqarpoq.
Kisianni:
- Pujortanermut politikki atuutsinneqalermalli sulisut suliffiup nalaani pujortannginnissaat suli unammillernartoqarpoq, taamaalilluni sulisunut pujortarunnaarnissamut pikkorissaaneq allatigullu pujortarunnaarnissamut suliniuteqarnissaq pisariaqarpoq, Qeqqata Kommuniani allaffeqarfik naliliivoq.
