Qeqqata Kommuniani akissarsisitsiniarneq ajornartoorutaasoq
Ullut 14-kkaarlugit akissarsiallit kukkunikkut marloriaammik akissarsitinneqarsimapput, sulisullu qaammammusiallit Grønlandsbankenimik atuisuunngitsut ataasinngorpat aatsaat qaammammusitinneqassallutik.
Leiff Josefsen
Kommunimi sulisut ullut 14-nikkaarlugit akissarsiallit kukkusoqarneratigut marloriaammik akissarsitinneqarsimapput, sulisullu qaammammusiallit ilaat ataasinngorpat juunip pingajuanni aatsaat akissarsitinneqassallutik.
Qeqqata Kommunia ilisimatitsivoq ullut 14-kkaarlugit akissarsiallit pissusissamisut tallimanngorneq maajip 24-ani 2024-mi akissarsitinneqarsimasut. Kisianni ippassaq sisamanngornermi maajip 30-iani 2024-mi akissarsiamik amerlaqaterluinnaanik aamma akissarsiatut ikisiffigineqarsimapput.
Qeqqata Kommunia ilimasaarutigaa kukkunikkut marloriaammik akissarsisitsisimaneq iluarsineqassasoq tulliani akissarsitinneqarnermi ilanngaatigineqarnerisigut.
Kukkusumik ullut 14-nikkaarlugit akissarsiallit marloriaammik akissarsitinneqarsimasut, qaammammusiallit ilaasa akissarsitinneqarnissartik utaqqisariaqassavaat. Kommunimmi nalunaarutigaa Grønlandsbankenimi kontoqanngitsut akissarsitinneqarnissaat ataasinngorpat pissasoq.
Aningaasaqarnermut pisortaq Malene Broberg ajuusaarpoq systemikkut kukkusoqarnerata kingunerisaanik ajornartorsiut pinngorsimasoq pillugu.
- Akissarsisitsinissamut aaqqissuussaanerup iluani kukkuneq pinngorsimavoq, suli paasinngilarput qanoq ililluni tamanna pisimanersoq, ajuusaarpugut taamaattoqarsinnaasimammat. Maannakkut misissuivugut kukkussut qanoq pinngorsimanersoq, teknikkikkut imaluunniit inuttut kukkusoqarsimanersoq suli inerniliisinnaanngikkallarpugut, taanna Sermitsiamut oqarpoq.
