Qeqqata Kommuniani ilaqutariit paarsisartut nersornaaserneqartut
Aappariit Marianne aamma Hans Nielsen ukiuni arlalinni qasujaallutik soqutiginnillutillu meeqqanik paarsisartuunertik pillugu nersornaaserneqartut, Najaaraq Poulsen kisimiilluni meeqqanik paarsisartuusoq maligassiuisutut aamma nersorneqarpoq.
Najaaraq Poulsen saamerlermi. Hans aamma Marianne Nielsen talerperlermi.
Foto: Qeqqata Kommunia
Qeqqata Kommuniani allaffeqarfimmi sisamanngorneq decembarip 19-at killitsinnartumik pisoqarpoq. Ullormi tassani ukiumoortumik nersornaasiisoqarpoq.
Ilaqutariit paarsisartut qasujaannertik asanninnermik tunniussisarnertik maligassiuinertillu pillugu nersorneqartut, Qeqqata Kommunianit nalunaarutigineqarpoq.
Marianne aamma Hans Nielsen: Angerlarsimaffik asanninnermik ulikkaartoq
Aappariit Marianne aamma Hans Nielsen ukiuni arlalinni qasujaallutik soqutiginnillutillu meeqqanik paarsisartuunertik aammalu meeqqat angerlarsimaffimmut eqqunneqartut asanninnermik annertuumik, kissalaamillu misigitillugit tikilluaqqusiuarnerat pissutigalugit, nersornaaserneqarput.
- Meeqqanut pisariaqartitsisunut ikiuerusussuseqarnersi kommunitsinnut assorujussuaq pingaaruteqarlunilu isumaqaqaaq, tamatsinnullu maligassiuisuunersi suliasilu imaannaanngitsut pillugit kommunalbestyrelsep ukiumoortumik innuttaasunut nersornaasiuttagaat ilissinut tunniunneqassasoq aaliangiunneqarpoq, Borgmesteri Malik Berthelsen oqarpoq.
Najaaraq Poulsen: Maligassiuisutut nersorneqarpoq
Marianne aamma Hans Nielsen saniatigut kisimiilluni paarsisartoq Najaaraq Poulsen nersorneqarpoq. Taanna meeqqanik sullissaqarnermini ilaatigut pingaartitappai meeqqat paarsani ilagalugit asimut illuaqqannut piliartoqatiginissai. Meeqqat peqatigalugit pingaartittarpai asimi inuunermik misigitissallugit, aamma qangaaniit inuusaasitsinnik inuuinnarnissatsinnut inooriaasitta ilaat imminut pilersorsinnaalernissamut ilinniartillugit, ukiumut inuussutissanik pileqatigalugit.Qeqqata Kommuniani borgmesterip maligassiuisutut nersornaasiinermini ilaatigut ima oqaaseqarpoq;
- Najaaraq kisimiittuugaluarlutit ukiuni taamak amerlatigisuni meeqqanik taamak amerlatigisunik paarsaqartarsimanerit eqqasaatigalugu nukittoqaatit. Inuiaqatigiinnullu pingaarutilimmik sullisseqataanerit maligassiuisuunerillu pillugu Kommunalbestyrelsep ukiumoortumik innuttaasunut maligassiuisimasunut nersornaasiuttagaa ilinnut tunniunneqassasoq aalajangiunneqarpoq, Malik Berthelsen oqarpoq.
Nersornaasiineq sisamanngornermi decembarip 19-anni kommunip allaffissuani persuarsiornartumik ingerlanneqarpoq
