Qeqqata Kommuniani ineqarnermut akiliutit appartinneqarlik

-  Ukiut makku angusimavagut najukkat qaammammut akisoorujussuanngorsimallutik, taamaalillunilu angerlarsimaffeqanngitsut amerliartuinnavissimallutik. Ilaatigut aningaasatigut malinnaasinnaannginnamik. Suut tamarmik akitsoriartorput. Inuuniarnerlu ilungersunarsiartuinnarluni, Barnabas Larsen (S) sunnersuutimini ilaatigut allappoq.

Qeqqata Kommuniani inissianut qaammammut akiliutit ukiumut procentinik marlunnik qaffanneqartarput, aserfallatsaaliinissaq qulakkeerniarlugu. Tamannalu Barnabas Larsenip allanngortikkusuppaa.

Illut najugaqarfiit inissiallu qaammammut akiisa apparsarneqarnissaat pillugu Borgmesteri Inatsisartunut naalakkersuisunullu allagaqarnissaa anguniarlugu Barnabas Larsen sisamanngornermi apriilit 25-ani ataatsimiinnermi siunnersuuteqartoq tusaaneqarsinnaassaaq.

-  Inuussutissat tamarluinnarmik akitsoraluttuinnarput. Tamakkununngalu ilutigitillugu angajoqqaat meeqqerivinnut il.il. Atukkat oqimaaqatigiisinniarlugit meeqqaminnut piffissamik atuinerat annikilliartuinnarsimavoq. Aningaasarsiornissaq pingaarnerujartuinnarmat, Barnabas Larsen siunnersuutini tunngavilersorlugu allappoq.

Ineqarnermut akiliut apparpat ajunngequtaasussat arlaliusut

Siunnersuuteqartoq isumaqarpoq ineqarnermut akiliut apparpat ilaqutariit nukittuut arlallit pilersinneqassasut:

-  Ilaqutariit nukittuut ingerlalluartullu amerlisarniassagutsigit Qeqqata kommuniani nukittorsaaqataasariaqarpugut. Sunngiffimmi sammisakkani piumassutsimik sulisarnerit meeqqat inuusuttullu eqqarsaatigalugit nukittorsaavissatut illoqarnerup najugaqarnerullu akitigut apparsaavigineqarnissaa aqqutissat ilagaat.

-  Taama apparsaasoqarsinnaappat sipaakkat amerlissapput, kaaviiaartitat amerlissapput , angerlarsimaffeqanngitsut ikilissapput, utoqqaat atugaat pitsaanerulissapput. Ikiortariallit ikilissapput, Barnabas Larsen naliliivoq.

Aserfallatsaaliinermik kinguleruteqqaneq annertusissasoq

Kommunimi ingerlatsisut naliliipput ineqarnermut akiliutit appartinneqarpata aserfallatsaaliinissaq qulakkeerneqanngippat Kalaallit Nunaat tamakkerlugu annetusiartuinnartutut aserfallatsaaliinermik kinguleruteqqaneq aningaasaqarnikkut kinguneqassasoq.

Allaffeqarfiup aamma nalilerpaa sanaartornermut aserfallatsaaliinermullu aningaasartuutit annertussusaat eqqarsaatigalugit ineqarnermut akiliut nunatsinni ukiuni amerlasuuni appasippallaartinneqarsimasoq, tamatuma kinguneralugu illut pisortanit pigineqartut iluarsartuunneqarnissaannut ullumikkut 2,5 mia. koruuninik kinguaattoqqallutik.