Qeqqata Kommuniani oqallinneq ilungersunartoq: Inuusuttut kommunalbestyrelseqalernissaanut siunnersuut itigartitsissutigineqartoq

Steffen Johansen Naleqqameersoq, Qeqqata Kommuniani kommunalbestyrelsip ataatsimiinnerani nassuiaavoq inuusuttut kommunalbestyrelsiannik pilersinneqarpat inuusuttut politikkikkut ilisimasaqanerulerlutillu tusaaneqarnerulissasut.

Suleqatigiilli allatut isummerput.

-  Uggorivara assut. Siunnersuummi pineqarpoq siunissami meeqqat politikkikkut ilisimasaqarnerulernissaat qaammaasaqarnerulernissaallu. Massakkut siunnersuut periarfissaavoq. Uggorivara aamma ima oqartoqaannarsinnaammat “tullissaanimut”. Kisianni massakkut periarfissaareerpoq, tullissaa utaqqisariaqanngilaq, massakkununa periarfissaq takkuttoq, Steffen Johansen pakatseqaluni kommunalbestyrelsip ataatsimiinnerani oqarpoq.

Steffen Johansenip siunnersuuta kommunalbestyrelsemi juunip ulluisa 27-anni siullermeerluni eqqartorneqarpoq aalajangerneqarlunilu qulaajagassat inuusuttut kommunalbestyrelsiat sunik sinaakkuteqassanersoq, allaffissornikkut qanoq annertutigisumik kinguneqarnissaa, kiisalu Nakuusaaqqat Inuusuttullu Kommunalbestyrelsiata assigiinngissusaat qulaajariarlugit Aningaasaqarnermut Ataatsimiititaliami qaqinneqassasoq.

Piffissaanngilaq

Kommunalbestyrelsimi suleqatigiit, tassa Siumut, Atassut Inuit Ataqatigiillu isumaqarput siunnersuutip akuerineqarnissaanut maanna piffissaanngitsoq.

Barnabas Larsen (S) ataatsimiinnermi nassuiaavoq siunnersuut akerlerinagu, kisiannimi akuerineqassappat piareersaatit arlallit pisariaqartut. Siunnersuutigaa qinersereernerup kingorna siunnersuut qaqinneqaqqissinnaasoq:

-  Akerlerinngilarput. Pilersaarusiornerilli amerlanerusut pisariaqarput.

Ataatsimiinnerup ingerlanerani pisoqarpoq. Nivi Heilmann Efraimsen (IA) Nakuusaaqqat Nakuusalu suunersuit nassuiaaleruttornerani oqarasuaammi peqataasut ilaat illariarpallappoq, Nivi Heilmann Efraimsenimut quarsaartitsisumik:

- Oqaluttugut illartoqartoq pissusissamisuunngilaq.

Naleraq pakatsisoq

Steffen Johansen aamma Hans Enoksen Naleqqameersut siunnersuutip itigartinneqarneranut pakatsipput. Hans Enoksen isumaqarpoq siunnersuutip Nakussaaqqat patsisigalugit itigartinneqarnera pakatsinarluinnartoq. 

- Itigartinneqarnera sianiilliorneruvoq. Nakuusaaqqat patsisiullugit siunnersuutip soqutiginarluinnartup itigartinneqarnera pakatsinarluinnarpoq. Nakuusaaqqat sulinerat ajoquserniarneqanngilaq.

Inuusuttut kommunalbestyresiata ingerlanneqarnera 110.000 koruuninik akeqarsinnasoq allaffeqarfik paasissutissiivoq.

Inuusuttut Kommunalbestyrelsiata sinaakkusissaat Kommunalbestyrelsemit aalajangersorneqassapput, taamaattorli nunatsinni kommunit Inuusuttut Kommunalbestyrelselinnit isumassarsiorsinnaapput.