Qeqqata
Kommuniata Sisimiuni umiarsualivia, 2012-imi 56,6 millionit
koruuninik akeqartumik sananeqartoq – ilaatigut kommunimut
akileraarummik 1 procentimik qaffaanikkut – maanna
tuniniarneqartussanngorpoq.
- Sisimiuni
kommunip umiarsualivia
tuniniarneqassasoq, kommunalbestyrelsip
qinigaaffimmi matumani kingullermik ataatsimiinnermini aalajangerpaa,
Qeqqata
Kommuniani borgmesteri Malik Berthelsen (S) Sermitsiamut oqarpoq.
Qeqqata
Kommuniata Sisimiuni umiarsualivia, 2012-imi 56,6 millionit
koruuninik akeqartumik sananeqartoq – ilaatigut kommunimut
akileraarummik 1 procentimik qaffaanikkut – maanna
tuniniarneqartussanngorpoq.
- Sisimiuni
kommunip umiarsualivia
tuniniarneqassasoq, kommunalbestyrelsip
qinigaaffimmi matumani kingullermik ataatsimiinnermini aalajangerpaa,
Qeqqata
Kommuniani borgmesteri Malik Berthelsen (S) Sermitsiamut oqarpoq.
Kommunip
umiarsualiviata tuniniarneqarnissaa matoqqasumik ataatsimiinnermi
oqaluuserineqarpoq, suliffeqarfiimmi namminersortut pillugit
paasissutissaqarmat. Kilisaataatileqatigiit namminersortut
umiarsualivimmik pisinissartik soqutigalugu kommunimut
attaveqarsimapput allilerniarlugulu kissaateqarlutik. Ilaatigut
aalisakkanik raajanillu qerititsivimmik anginerusumik sanasoqassaaq,
tassanngaanniillu tunisassiatik Danmarkimut nassiuteqqaarnagit
nunanut allanut toqqaannartumik avammut tuniniartalerusullugit.
-Kilisaataatileqatigiinniit
saaffigineqarnikuuvugut kommunip umiarsualiviata pisiarinissaanik
soqutiginnittunik. Isumaqarpugut pilersitsiniartut pilersarutaat
assut pissanganartuusoq aammalu nunatsinnut kommunimullu annertuumik
iluaqutaassasoq
Malik Berthelsen oqarpoq.
Taamaattorli
kilisaataatillit namminersortut Sisimiut umiarsualiviannit avammut
tuniniaasarnissaminnik pilersaaruteqartut kikkuunersut eqqaanngilai.
-
Minnerunngitsumik
aalisakkat toqqaannartumik nunatsinniit, Sisimiuniit, pisisunut
toqqaannartumik nassiunneqartalernissaannik suliniutaat
eqqarsaatigalugu isumaqarpugut assorujussuaq soqutiginartoq.
Tamannami ukiorpassuarni eqqartorneqartartoq tamatta ilisimavarput,
Malik Berthelsen oqarpoq, nassuiaallunilu kommunip umiarsualivimmik
sanaartornissamut taarsigassarsiani taarsereersimalerai.
Umiarsualivimmi
tattorliuunneq
Umiarsualivimmi
ajornartorsiorneq 2011-mi Qeqqata Kommuniani kommunalbestyrelsi
aalajangerpoq, Sisimiuni umiarsualivik allilerneqassasoq,
umiarsualivimmi tattorliuuttoqarnera
pissutigalugu.
Taamanikkut Kitaani uuliamik
aamma ujaasisoqarpoq, tamannalu Sisimiuni umiarsualivimmut
tattorliuutsitsisorujussuulluni.
- 2013-imi
uuliamik
ujaasisoqassagaluarpat ujaasisoqassanngikkaluarpalluunniit
umiarsualiviup allilerneqarnissaa pisariaqarluinnarpoq. Sisimiut
Umiarsualivianni
maannakkut pissutsit pissutigalugit kilisaatit, umiarsuit
tunitsiviit,
umiarsuit
takornariartaatit
umiarsuarnillu uuliamik ujaasisunut
pilersuisut umiarsualivimmi
inissaqanngillat, taamaattumillu Nunatsinni
nunanilu allani umiarsualivinnut allanut talikkusunnerusarlutik,
borgmesteri Hermann Berthelsen Sermitsiamut taamanikkut oqarpoq.
Umiarsualiviup
allilerneqarnera 56,6 millionit koruuninik akeqartoq, Sisimiuni
ineriartornermut suliffissaaleqisunillu ikilisaanermi
iluaqutaasussatut aalajangiunneqarpoq.
Namminersorlutik
inuussutissarsiortut umiarsualivimmik
ingerlatsilluarnerussasut
Inuussutissarsiortut
namminersortut umiarsualivimmik kommunimit
pitsaanerusumik
ingerlatsisinnaassasut,
Qeqqata Kommuniani kommunalbestyrelsi isumaqarpoq.
- Isumaqarpugut kommuni umiarsualivimmik ingerlatsisuunissaaninngaanniit namminersortut ingerlatsippata tamanut pitsaanerpaasoq, pissutigalugu inatsisit malillugit kommuni umiarsualiveqarnikkut aningaasanik toqqaannartumik isaatitsinissaa periarfissaqanngimmat, taamaallalli aserfallatsaaliinermut matussutissanik akiliuteqartitsisinnaalluta, Malik Berthelsen oqarpoq.
- Taamaattumik umiarsualivik namminersortunit pigineqaraluarpalluunniit kommunimi allatigut kaaviaartitsinermik pitsaasumik pilersitseqataassaaq.
-Kommunip inatsisit atuuttut naapertorlugit, umiarsualivimmik soqutiginnittunut tamanut tuniniaanissaanut piareersimasariaqarpugut, aamma annerpaamik neqerooruteqartumut tuniniaanissamut, Malik Berthelsen oqarpoq.
