LGBTQIA+
Qillaq: Nunatsinni inuit pisinnaatitaaffii eqqarsaatigalugit ilumut taama kinguarsimatigiinnarniarpugut?
Qillaq Olsen LGBTQIA+-itut inuusuttuaraalluni uumissuineq, akeqqersimaarneq assigiinngisitsinerlu misigisimavai. Misigisimasani nalinginnaasutut isigilersimavai, taamaattumillu politiinut nalunaarutigineq ajorsimallugit. Assigiinngisitsisarneq pillugu inatsisissatut siunnersuut Inatsisartunit akuerineqarpat, misigisimavoq nunatsinni toqqissisimalersinnaalluni.
IPS
Qillaq Olsenip uumissuinermik, akeqqersimaarnermik immikkoortiterinermillu misigisani alianartut LGBTQIA+-inut ilaanermini misigisani IPS-ip Kalaallit Nunaanni LGBTQIA+-inut atugassarititaasut pillugit nalunaarusiaani saqqummersinneqaqqammersumi oqaluttuarai.
Taassuma misigisimasani ulluinnarsiutigilersimallugit taamaattussaannartullu eqqarsartalersimanini Sermitsiamut oqaluttuarai. Allaat politiinut nalunaarutiginnittarsimanani.
- Nammineq aqqusaagaqarnikooqaanga ukiukikkaluarlunga. Uumissuinernik, akerartuisut taavalu immikkoortitsinermik imaqartut. Ima ajortigaaq ulluinnarsiutigilersimagaluarlugit taamaaginnartussatut eqqarsalerlunga taavalu politiinut tunniussinnaagaluit tunniunnissaanut nakerinagu.
- Tassami pinerlunnermi inatsi nunatsinni malikkatsigu, qinngarsuinermik tunngaveqarluni pinerluttuliornerit tassa "hate crimesinik" politiit tigusisinnaannginnamik. Danmarkimili pillaasinnaanermik inatsip atornerani "hate crimesit" inuup tunuliaqutaa peqqutigalugu soorlu LGBTQIA+imik tunuliaquteqarluni qinngasuinernik pinerluttuiornermik aqqusaagallit politiinut tunniussinnaatitaapput.
Neriuut
Nalunaarusiami "Kalaallit Nunaanni LGBTQIA+-iuneq"-mi Qillaq Olsen misigisaminik oqaluttuarpoq. Taassuma oqaluttuaraa suiaaqatiminut soqutiginnittuunini sivisuumik ilisimasimallugu.
Qillap ikinngutini klassimilu atuaqatini illoqarfimmeeqatigereerlugit angerlarpoq, angut aqqusinermi takkuppoq- allanik inoqanngilaq unnuaallunilu. Inuk taanna ilisarisimanngilluinnarpaa, nakuuserfigilerpaali “homorsuarmillu” taagorlugu.
Pisup kingorna annilaanganeq nikallunganerlu aqqusaarpai, ilinniarninilu naammassisinnaanagu.
Inatsit nutaaq suliarineqalersoq
Inatsisartut inatsisissatut siunnersuut ataasinngornermi maajip ulluisa 13-anni siullermeerlugu oqaluuserissavaat. Tassani siunertaavoq assigiinngisitsinermik akiuiniarnissaq aammalu kikkut tamarmik assigiimmik pisinnaatitaaffeqarnissaat aamma periarfissaqarnissaat qulakkeerniarlugu.
Tamanna Qillaq Olsenimut neriulersitsivoq:
- Kiisami nunatsinni inatsisissatut siunnersuut oqaluuserineqarlerpoq, aqqusaarsimasakka eqqarsaatigalugit qangali eqqartorneqalereersimasinnaavoq, taamaasilluni ullumikkut inuttut toqqissisimanerusimasinnaavunga nammineq nunanni.
Inatsisissatut siunnersuut akuerineqassappat LGBTQIA+-itut inuusunut nunatsinni toqqissisimanermik pilersitsissasoq Qillaq Olsenip neriuutigaa:
- Taamaammat neriuppunga ulluni qaninnerpaani akuerineqarumaartoq, nunatsinni ikinnerussuteqartuulluni toqqissisimanermut isumaqarsinnaammat taavalu ammanerusumik eqqartorneqalersinnaassalluni. Isummallu piliutigiinnakkanik kukkusut ilisimasakissuseq peqqutigalugu inuiaqatigiinni pitsaanerulersinnaaneranut isumaqarumaartoq paasissutissat eqqortut piviusullu atorlugit.
