ILULISSAT
Qimmeqatigiit napparsimanermik eqqugaapput, ilimagineqarpoq nerukkaatissaat pissutaasimassasut
Ilulissani innuttaasut arlallit qimmeqartut qimmitik pillugit ernummateqarput. Tamanna pissuteqarpoq qimmeqatigiit ataatsit tassanngaannartumik napparsimalersimanerannut pissutaasoq nalornissutigineqarmat. Maanna uumasut nakorsaat Asger von Wenck qimmeqartunut eqqissisaavoq: - Qimmit napparsimanerannut ersiutaasut tunngavigalugit, ilimanarnerpaavoq nerukkaatissat nerisatik napparsimalissutigalugillu ilaasa toqqutigisimassagaat, Uumasut Nakorsaqarfik Inuussutissalerinermullu Oqartussaaffik eqqissisaavoq.
Qimmeqatigiit ataatsit piffissap sivikitsup iluani napparsimalerput. Marluk napparsimanerminnik toqquteqarput, marlullu aniguillutik. Maanna Kalaallit Nunaanni Uumasut Nakorsaqarfik Inuussutissalerinermullu Oqartussaaffimmit qimmiutilinnut eqqissisaapput: - Ilimanarnerpaavoq nerisaminnit napparsimalersimassasut. Assimiittut qimuttuitsut allaaserisamut attuumassuteqanngillat.
Assi: Leiff Josefsen
Ilulissani qimuttunik qimmiutilik qimmiminik marlunnik annaasaqarpoq, qimmillu allat marluk napparsimareerlutik peqqissipput.
Kalaallit Nunaanni Uumasut Nakorsaqarfiani atorfilik uumasut nakorsaat, Asger von Wenck, Sermitsiamut oqarpoq Uumasut Nakorsaqarfiata naliliinera naapertorlugu qimmit napparsimanerminni ersiutaasa takutikkaat nerukkaatissanik nerisimanerannut attuumassuteqarsinnaanera ilimanarnerpaasoq.
Ernumanissamut pissutissaqanngilaq - qimmilli nakkutigineqarnissaat kaammattuutaavoq
Kalaallit Nunaanni Uumasut Nakorsaqarfiata Ilulissani qimmiutillit akornani akornanni ernumanissamut pissutissaqanngitsoq naliliipput, taamaattorli aamma kaammattuuteqarput nalinginnaasumik qimmit nakkutigilluarneqassasut.
Taamaattorli aamma Asger von Wenck kaammattuuteqarpoq qimmiutit akornanni napparsimalersimasinnaanermik takussutissanik naammattoorsisoqassaguni, taava nunatsinni uumasunut nakorsaqarfik mailikkut saaffigineqassasoq uumasut@nanoq.gl aqqutigalugu.
Oqartussat paasissutissanik katersuipput, allannguuteqartoqarpat nalunaarutiginnittoqassaaq.
Asger von Wenck aamma ilisimatitsivoq Ilulissani allamik pissuteqarluni marlunngornermi 10. marts 2025-imiissalluni paasissutissanik amerlanerusunik katersissamaarluni.
- Maannamut ilisimasaqarfigisatsinnit, tunillaassuussinnaasumik nappaateqartoqanngitsoq takussutissaqarpoq, taamaattumik Avannaata Qimussersua 2025 Sisimiuni aamma qimussertartut unammiuaarneri allat pilersaarutit malillugit ingerlanneqarsinnaapput, taanna ilisimatitsivoq.
