Qimmit qaasuttut pillugit eqqartuussutip suliareqqitassanngortinneqarnera aallartilertoq
Angutip 66-inik ukiullip qimmii Sisimiut eqqaani inunnik meeqqanillu katillugit tallimanik kiisinikuugaluartut, inuttaata pigiinnarsinnaagai aalajangerneqarpoq. Eqqartuussut unnerluussisussaatitaasup Nunatta Eqqartuussisuuneqarfianut suliareqqitassanngortippaa, taannalu pingasunngornermi aallartissalluni. Unnerluussisussaatitaasup sakkortunerusumik pineqaatissiisoqarnissaa kissaatigaa.
Qanoq pisoqarpat qimmeqaqqusaajunnaartoqassava? Pingasunngorpat taanna akissutisissavarput.
Assi: Morten Okkels
Qimut qimuttut pillugit inatsit tunngavigalu eqqartuussisoqarnera Sermitsiamit qaqutikkut malinnaavigisarparput. Angutilli qimmii qimuttut pillugit suliaq Sermitsiamit pingasunngornermi malinnaavigissavarput. Suliami Qeqqata Eqqartuussisoqarfiani aalajangiiffigineqarnikumi unnerluussisussaatitaasup suliareqqitassanngortitsinera Nunatta Eqqartuussisuuneqarfiani aallartissaaq.
Angutip 66-inik ukiullip qimmii 2023-mi apriilimi maajimilu inunnik pisuni assigiinngitsuni qimmii saassussimanerat pissutaalluni qimminut qimuttunut inatsimmik unioqqutitsisimasutut marsip 18-iani eqqartuussisoqarfimmit pisuutinneqarpoq.
Angut eqqartuussisoqarfimmit ukiuni tallimani qimminik allanillu uummasuuteqaqqusaajunnaarsinneqarpoq. Eqqartuussulli pinerluuteqaqqittoqarpat aatsaat atuutilersinneqassalluni. Tassa ajortoqaqqinngippat angutip qimmini pigiinnarsinnaavai. Eqqartuussutip ingerlaannaq atuutilersinneqarnissaa unnerluussisussaatitaasup piumasarinikuuaa.
Qimmit qaasunnerat arlallit misigigaat
Angut pisut pingasut assigiinngitsut pillugit eqqartuunneqarpoq, taakkualu ilaat Sisimiuni Nalunnguarfiup imeqarfiullu akornanni pivoq.
Tassani ataataq paninilu taamani arfineq-pingasunik marlunnillu ukiullit ilagalugit qimminit 15-init saassunneqarput. Qimmit uiarterniarsimagaluarpaat tamarmilli kiineqarlutik. Ataatasoq panialu angajulleq arlalinnik ikilerneqarnermikkut kingorna mersortittariaqarsimapput. Niviarsiaraq niaqumigut kilersimavoq.
Sisimiuni pisimasumi allami inuit marluk aamma kiineqarnerminni ajoqusernerat suliarineqartariaqarsimapput.
Pisut pingajuanni arnaq angutip 66-inik ukiullip Kangerlussuarmi qimmiinit saassunneqarpoq, ajoqusernanili aniguilluni.
Unnerluussisussaatitaasup pineqaatissiissut sakkortunerunissaa kissaatigaa
Angut 66-inik ukiulik pisuunnginnerarpoq, eqqartuussisoqarfimmili pineqaatissiissutigineqartoq akueralugu.
Pisimasut ukiut marluk qaangiutereersut pimmata eqqartuussutip pinerluttoqaqqissagaluarpat atuutilersinnissaa Qeqqata Eqqartuussisoqarfiani aalajangiinermi tunngavilersuutigineqarpoq. Angutip qimmit piffissap ingerlanerani aamma toqussimavai, taamaattumillu akiligassinneqarani.
Angutilli Sisimiuni ilaqutariinni pisumi ataataasumut, pisumi isaruai aserorsimammata, katillugit 6.503 koruuninik taarsiivigeqquneqarneranut akuersivoq.
Angummut unnerluutigineqartumut pineqaatissiissut sakkukippallaartoq unnerluussisussaatitaasoq isumaqarpoq, taamaattumillu aalajangiineq Nunatta Eqqartuussisuuneqarfianut suliareqqitassanngortillugu.
