Qineqqusaartut allattorsimaffiannik tunniussinissamut killigititaq kinguartinneqartoq
Teknikkikkut ajornartorsiutit paatsoornerillu pissutigalugit qinigassanngortittut allattorsimaffiannik tunniussinissamut killissarititaq nalunaaquttap-akunneranik ataatsimik kinguartillugu Qinersinermut Ataatsimiititaliaq aalajangerpoq.
Leiff Josefsen
Inatsisartunut qinersinissamut partiit qinigassanngortitaminnik nalunaarsuinissaannut marlunngornermi nalunaaqutaq ullup-qeqqanut killigititaavoq.
Piffissarli killigititaasoq sioqqutilaarlugu akunnermik ataatsimik kinguartillugu nalunaaqutaq ataatsimut killeqalerpoq.
Qinersinermut Ataatsimiititaliami siulittaasoq aamma Naalakkersuisut Siulittaasuata Naalakkersuisoqarfiani pisortaq Hans-Peder Barlach Christensen Sermitsiamut paasissutissiivoq.
Partiit tamarmik qinigassanngortittut allattorsimaffii ullup-qeqqanngitsoq tunniussimagaat imaluunniit tunniunniarsimagaluaraat taassuma paasissutissiissutigaa. Teknikkikkulli ajornartorsiutit pissutigalugit qinigassanngortittut allattorsimaffii tamakkeratik piffissaq eqqorlugu nassiunneqarsimanngillat.
Teknikkikkut ajornartorsiutit ilaatigut pissutigalugit Qinersinermut Ataatsimiititaliap allaffeqarfianit partiinut attaveqarnermi ilaatigut paatsoortoqarsimavoq kiisalu tunniussiniarnermi teknikkikkut ajornartorsiortoqarsimalluni.
Tamanna pissutigalugu Qinersinermut Ataatsimiititaliaq piffissamik killiliussamik kinguartitsivoq, maannalu partiit tamarmik qinigassanngortittut allattorsimaffiat piffissaq eqqorlugu tunniussimagaat akuerineqartullu maanna saqqummiunneqartut Hans-Peder Barlach Christensen ilisimatitsivoq.
Partiit qinigassanngortittut allattorsimaffianni kukkuneqarpat tallimanngorpat nalunaaqutaq 09.00 tungaanut Qinersinermut Ataatsimiititaliamut naammagittaalliuuteqarsinnaapput.
