Qinersineq: Kiffartuussinermut isumaqatigiissutit nutarterneqassasut

Inatsisartunut qinersinissamut atatillugu Ilulissani Atuarfik Mathias Storchimi sapaatiummat 24. februar qinersisartunik ataatsimiisitsineq KNR-TV-kkut aallakaatinneqarmat apeqqutit inuiaqatigiit inuuniarnerannut kalluaasut arlallit tikinneqarput.

Piffissamilu kingullermi ilaasunik silaannakkut angallassinermi ajornartorsiutut annertuut oqaluuserineqartunut pingaarnernut ilaapput.

Piffissami kingullermi nuna tamakkerlugu minnerunngitsumillu avannaani qulimiguullit atorlugit ilaasunik angallassinermi ajornartorsiutit annertuut Ilulissani qinersisartunik ataatsimiisitsinermi kissassimaarfiusumik oqallissutigineqartunut ilaapput, angallannermilu annertuumik ajornartorsiuteqartoqartoq, Naalakkersuisooqatigiit Inuit Ataqatigiit Siumukkullu nassuerutigaat.

Assersuutigalugu januarimi Qeqertarsuup Tunuani qulimigiilik H155 atorlugu ilaasunik angallassinissamut pilersaarutaasuni 283-iusunit taamaallaat 196-it pilersaarutit malillugit ingerlanneqarsimasut sapaatip akunnera kingulleq Air Greenlandip Sermitsiamut paasissutissiissutigaa.

 Kiffartuussinissamut isumaqatigiissutit nutarterneqassasut

Pisortat angallassisarnerat qulakkeersinnaaniarlugu Namminersorlutik Oqartussat kiffartuussinissamik isumaqatigiissutinik arlalinnik atsiugaqarput, silaannakkullu ilaasunik angallassinermut tunngatillugu Naalakkersuisut Air Greenlandimik, Disko Line-mik aamma Norland Air-imik 2021-miit 2030-p tungaanut atuuttunik isumaqatigiissusiorput.

Taakkuli ataqatigiinnginnerat iliuuseqarfigineqartariaqartoq, Naalakkersuisut siulittaasuat aamma Inuit Ataqatigiinni siulittaasuusoq Múte B. Egede oqarpoq.

- Kiffartuussinermi isumaqatigiissutit atuuttut aammalu angallannermi toqqammavigisagut nalilersoqqinneqarlutillu nutarterneqarnissaat avaqqunneqarsinnaanngilaq.

- Taammat kiffartuussinissamik isumaqatigiissutit ataqatigiinngitsumik inissisimanerat qinigaaffiup uuma naajartornerani takusinnaalersimavarput, 2030-milu kiffartuussinissamut isumaqatigiissutit naanissaannut utaqqeqqaarnagu nutarterinissaq pisariaqarmat, Naalakkersuinikkut sulianik aallartitsivugut, Naalakkersuisut siulittaasuat oqarpoq.

Taamatuttaaq Siumup siulittaasua aamma Aningaasaqarnermut Akileraartarnermullu Naalakkersuisusoq Erik Jensen, Siumut, angallannerup pitsaanerulernissaa pillugu iliuuseqartoqassasoq oqarpoq.

- Kiffartuussinissamut isumaqatigiissutit allanngortariaqarput ullumikkullu atugassarititaasut aaqqinneqartariaqarput. Akisussaaffik Siumuminngaanniit qimarratiginavianngilarput.

- Aaqqitassat tamaaviisa aaqqinniarlugit innuttaasullu ajornartorsiuteqarfigisaat iluarsiiffigineqarniassammata, taamaattumik kiffartuussinissamut isumaqatigiissutit isumaqatigiissutit oqariartuutigivarput, Erik Jensen oqarpoq.

Mittarfeerarpassuit sananeqassasut

Uummannami, Qeqertarsuarmi, Qasigiannguani, Kangaatsiami, Narsami, Nanortalimmi, Tasiilami, Ittoqqortoormiinilu suluusalinnut mittarfeeqqat siunissami qaninnermi sanaartorneqarnissaat pillugu pilersaarusiornissamut aningaasanut inatsimmi immikkoortitsisoqareersoq, Erik Jensen oqarpoq. Tamanna siunissamut aningaasaliinerusoq, aningaasanillu tulleriaarinikkut aningaasat pissarsiarineqassasut, taassuma oqaatigaa.

Angallannikkut nunatsinnut tulluarnerusumik aaqqiissuteqartoqartariaqartoq, tamaattumillu Illoqarfiit suluusalinnut mittarfeqanngitsut mittarfiliorfigineqarnissaat massakkut aallartisaqqinneqartoq, Naalakkersuisut siulittaasut Múte B. Egede ilanngullugu oqarpoq.

Naleqqap siulittaasua Pele Broberg Naalakkersuisooqatigiit angallanneq pillugu kiffartuussinissamik isumaqatigiissusiorsimanerat pillugu siornatigut arlaleriarluni sakkortuumik isornartorsiusarpoq, kiffartuussinermilu isumaqatigiissutit massakkut atuuttut pituttorfiujunnaarlutik, qulimiguullit nutaat anginerusut sermernartumilu atorsinnaasut atorneqalertariaqartut, taanna oqarpoq.