Qinersinerit marluk - inernerit assigiinngitsorujussuit
Inatsisartunut kommunimullu qinersinermi kommunini assigiinngitsuni partiit qinerneqarnerat misissuataaraanni Siumut Nalerarlu qanoq inississimanersut erseqqarippoq.
Kommuninut apriilip aallaqqaataani qinersisoqarpoq.
Assi: Oscar Scott Carl
Kalaallit Nunaanni qaammatip ataatsip ingerlanerani qinersinerit pingaarutillit marluk pipput.
Ingammik Inatsisartunut marsip aqqarngani qinersineq tupaallannartumik inerneqarpoq. Demokraatit Inatsisartuni ilaasortaatitai pingasuniit qulinut amerleriarput, siulittaasuallu Jens-Frederik Nielsen Naalakkersuisunut nutaanut ataasinngorpat Inatsisartunit akuerineqartussanut siulittaasunngussalluni.
Qinersinernili marlunni imminnut taama qanitsigisuni qinersisartut nuna tamakkerlugu politikki kommunimilu politikki immikkoortissinnaavaat?
Aappi, immikkoortilluarsinnaavaat.
Valg.gl-imi kommunini qinersinerit pillugit kisitsisit misissuataaraanni tamanna takuneqarsinnaavoq.
Naleraq Inatsisartunut qinersinermi qinerneqarnerminut sanilliullugu kommuninut qinersinermi qinernikinneruvoq.
Killormuuanillu Siumumut tunngatillugu aamma taamaappoq, tassa kommunimut qinersinermi Inatsisartunut qinersinermit amerlanerusunik taaguunneqarami.
Avannaata Kommunia
Nunap kommuniisa avannarpasinnersaanni Naleraq Inatsisartunut qinersinermi 33,7 procentinit taaneqarluni ajugaavoq, kommuninullu qinersinermi Siumut 36,2 procentinit taaneqarluni ajugaalluni.
Kommunimi ilaasortat ima agguataarneqarput: A: 2, D: 4, IA: 1, N: 3, S: 7.
Avannaata Kommuniani kommunimut Inatsisartunullu qinersinermi partiit qinerneqarnerat ima agguataarsimapput.
Kommune Kujalleq
Demokraatit Kommune Kujallermi Inatsisartunut kommunimullu qinersinermi ajugaavoq.
Kommunimi ilaasortat ima agguataaqqagallarput: D: 7, S: 5, IA: 3
Kommune Kujallermi kommunimut Inatsisartunullu qinersinermi partiit qinerneqarnerat ima agguataarsimapput.
Qeqqata Kommunia
Naleraq Qeqqata Kommuniani Inatsisartunut qinerneqarluarpoq, qinersisinnaasut 30,1 procentiinit taaguunneqarluni. Siumut kommunimut qinerneqarluarluni 33,2 procentinit qinerneqarpoq.
Kommunimi ilaasortat ima agguataaqqapput: A: 1, D: 2, IA: 2, N: 4, S: 6.
Qeqqata Kommuniani kommunimut Inatsisartunullu qinersinermi partiit qinerneqarnerat ima agguataarsimapput.
Kommuneqarfik Sermersooq
Illoqarfiit pingaarnersaanni IA annerpaajulluni 32 procentinit qinerneqarpoq. Demokraatit Inatsisartunut qinersinermi ajugaalluni 33,5 procentinit qinerneqarpoq.
Kommunimi ilaasortat ima agguataaqqagallarput: D: 4, IA: 7, S: 7, N: 1.
Kommuneqarfik Sermersuumut kommunimut Inatsisartunullu qinersinermi partiit qinerneqarnerat ima agguataarsimapput.
