ANINGAASAQARNERMUT POLITIKKI
Qinersinissaq sioqqullugu aningaasanut inatsisissatut siunnersuut kingulleq
Meeqqat atuarfiini atuartut ilinniarfinnilu ilinniartut atortorissaarutiminnik aasaanerani atuanngiffeqareernerup kingorna kisimik piareersitseqqamminngikkat. Aningaasaqarnermut akileraartarnermullu naalakkersuisoq, Erik Jensen (S), maanna aningaasaliissutissanut missingersuutinik annertuunik suliaqarpoq. Tassami 2025-imut aningaasanut inatsisissatut siunnersuut Naalakkersuisunit saqqummiunneqangajalerpoq, pilersaarutit malillugit pissappat pingasunngornermi aggustip 21-ani saqqummiunneqassalluni.
Partiit Naalakkersuisullu aningaasanut inatsisissatut isumaqatigiissutaat 2024-mut saqqummiunneqarnerani assilisaq. Naalakkersuisut partiillu akornanni aningaasanut inatsisissaq pillugu isumaqatigiissusiortoqarsinnaajumaarnersoq tamatumuuna nalunarluinnarpoq, maannami Inatsisartunut qinersinissamut, kingusinnerpaamik 6. april pisussamut agguataarinninnermi suleqatigiinnissaat ilimanaateqarluarpoq, tassami tamanna kingullermik aningaasanut inatsisissatut siunnersuutissaaq Inatsisartunut qinersinissamut, kingusinnerpaamik 6. april 2025-mi pissasoq.
Assiliisoq: Leiff Josefsen
Aningaasanut inatsisissatut siunnersuutip saqqummiunneqarnissaa utaqqisaavoq. Tassungali atatillugu Aningaasaqarnermut akileraartarnermullu Naalakkersuisoq, Erik Jensen (S), erseqqissaavoq, ullulerneqarallarsimasoq nunatta aningaasatigut aqunneqarnerani missingersuutissap tamanut saqqummiunneqarnissaa, tassalu pingasunngornermi aggustip 21-iani.
Apeqqutigineqarmat aningaasanut inatsisissatut siunnersuutip ilusilersornerani, Inatsisartunut qinersineq qanillattornera Naalakkersuisut malugisinnaaneraat, aningaasaqarnermut Naalakkersuisoq akivoq:
- Soorunami malugisinnaavarput, suliassanik nutaanik aningaasartuutaasussanillu iliuuseqarnissaq mianersuuttariaqartoq, taamaattorli erseqqissaatigissavara, aaqqissuusseqqinnernut iliuutsinullu suliaralugit aallartinneqareersunut suliat ingerlaannarnissaat anguniarlugu aningaasaliissutissat sapinngisarput naapertorlugu inissinniartussaassagatsigit, peqqinnissaqarfik pillugu isumaqatigiissummut, ilinniartitaaneq pillugu aaqqissuusseqqinnermut aammalu ineqarneq pillugu aaqqissuusseqqinnermut aningaasartassat matumani eqqanaarniagassatta ilagaat.
Akileraartarnermut ministeri aningaasanik nassarluni tikeraassava?
Aningaasaqarnikkut qanoq ingerlatsisoqartariaqarnera Naalakkersuisunit saqqummiunneqartinnagu, Danmarkimi akileraartarnermut ministeri, Jeppe Bruus, tikeraartigineqassamaarpoq.
Tassunga atatillugu Erik Jensen oqaluttuarpoq, Kalaallit Nunaata Danmarkillu akornanni isumaqatigiissutit anguniakkallu nutaat ingerlanneqartut, kisianni pilersaarutit taakku saqqummiussinnaanngikkallarnerarpai.
- Taakku pillugit paasissutissat pissarsiarissavasi, skatteministerip ataasinngornermi aggustip 19-iani aallartittumik tikeraarneranut atatillugu tusagassiortunik katersortitsinermi saqqummiukkumaaratsigit.
Erik Jensen maanna Danmarkimi pisortatigoortumik angalavoq. Tassunga atatillugu suliassat angalanissamut pilersaarutaani allattorsimaffiani arlalissuit saqqummiunneqarput.
Ukioq kingulleq, ukioq manna ukiunilu tulliuttuni akigititat allanngorarneri pereerlutillu ilai pisussaapput, tassunga pissutaavoq EU-mi aalajangersakkat naapertorlugit pingaartumik angallannikkut assartuinikkullu akit qaffanneqaramik, taakkulu Kalaallit Nunaanni innuttaasunut aningaasaqarnikkut sunniuteqarluinnartumik kinguneqartarput.
Eqqoriaanerinnaagaluarpoq, isumaqatigiissutimmi nutaat suli saqqummiunneqanngillat, taamaattorli ilimagineqarsinnaasut ilageqqooqaat EU-mi aalajangersakkat malillugit nunatta iliuuseqarfigisinnaanngisaanik akit qaffannerisa kingunerisaanik nunatsinni innuttaasut eqqugaasimanerannut matussutaasinnaasunik nassaarniartoqarsimasinnaavoq, tassami ukiuni makkunani pimoorutivillugu EU-mi ilaasortat nukissiuutinut mingutsitsinnginnerusunut ikaarsaarput, tassungalu atatillugu orsussamik uuliamik akitsuisoqarnikuulluni sulilu akitsuisoqartussaalluni.
