Kommunimut qinersinissaq ullunik sisamanik sioqqullugu
qinersinerup inernerisinnaasaa allanngorpoq.
Naalakkersuisunut ilaasortani qulini, tallimanngormat
marsip 28-ani Nuummi kulturip illorsuani Katuami saqqummiunneqartuni,
marlunngornermi apriilip aallaqqaataani kommunimut qinersinissamut
qinigassanngortittut sisamat nikorfapput: Peter Borg aamma Nivi Olsen,
Demokraatit, Aqqaluaq B. Egede, Inuit Ataqatigiit aamma Bentiaraq Ottosen,
Atassut.
POLITIKERIT QULINGILUAT MARLOQIUSAMIK QINIGAASUT
Inatsisartunut ilaasortat 15-it marsip 11-ani
qinerneqartut apriilip aallaqqaataani kommunimut qinersinermi
qinigassanngortipput. Taakkunannga qulingiluat qinerneqarput, taamaalillutik
ukiuni sisamani tulliuttuni marloqiusamik qinigaapput. Demokraatit Inatsisartuni
qinigaatitaasa affaat nuna tamakkerlugu kommunimilu politikeriupput.
Atassut: Aqqalu C. Jerimiassen, Inatsisartut/Avannaata Kommunia.
Demokraatit: Margrethe T. Andersen aamma Minik Serano Frederiksen,
Inatsisartut/Kommune Kujalleq. Justus Hansen aamma Nivi Olsen,
Inatsisartut/Kommuneqarfik Sermersooq. Simigaq Heilmann, Inatsisartut/Kommune
Qeqertalik.
Naleraq: Pele Broberg, Inatsisartut/Qeqqata Kommunia. Jens Napãtôk,
Inatsisartut/Avannaata Kommunia.
Siumut: Kim Kielsen, Inatsisartut/Kommuneqarfik Sermersooq.
Kommunimut qinersinissaq ullunik sisamanik sioqqullugu
qinersinerup inernerisinnaasaa allanngorpoq.
Naalakkersuisunut ilaasortani qulini, tallimanngormat
marsip 28-ani Nuummi kulturip illorsuani Katuami saqqummiunneqartuni,
marlunngornermi apriilip aallaqqaataani kommunimut qinersinissamut
qinigassanngortittut sisamat nikorfapput: Peter Borg aamma Nivi Olsen,
Demokraatit, Aqqaluaq B. Egede, Inuit Ataqatigiit aamma Bentiaraq Ottosen,
Atassut.
Nivi Olsen kisimi Kommuneqarfik Sermersuumi qinigaavoq, taannali aamma
kommunimi ataatsimiittarfimmut takkutissanngilaq.
Inatsisartunut Naalakkersuisunullu inatsit atuuttoq,
kingullermik 2022-mi allanngortinneqarsimasoq, naapertorlugu Naalakkersuisunut
ilaasortanngortut atorfinnit allanit, ilaatigut kommunalbestyrelsimut
ilaasortaanermit, soraartussaapput. (Qinigaasinnaanermut Misissuinermut
Ataatsimiititaliap ilaasortat ataasiakkaat atorfimmik aalajangersimasumik
atorfiginnittuarnissaannik immikkut ittumik akuersisarpoq,
kommunalbestyrelsimulli ilaasortaanermut tunngatillugu taama
pisoqarsimanngisaannarpoq).
Qinersisartup politikeri taannarpiaq kommunalbestyrelsemi
ilaasortanngortinniarlugu qineqqusaartoq inuttut qinertarpaa; taamaanngippat
partii qinersinnaavaa. Taamaammat qinersisartorpassuit kommunimut
qinersinerminni Naalakkersuisuni ilaasortamik qinersinertik atulussineqarsinnaasoq
arajutsisimanngilaat. Naalakkersuisunulli ilaasortat qulit, Inatsisartut
ataasinngorpat ivertinneqarlutik ataatsimiinneranni toqqarneqartussat, aqqi
qinersinerup ulluani ilisimaneqareermata siusinnerusukkut
ilisimatinneqareerput. Qinersisartulli 228-t qinigassanngortittoq ataaseq
qinersimavaat, taannali kommunalbestyrelsip ataatsimiittarfianiinnani
inatsisartut ataatsimiittarfianniissaaq.
Illuatungianik Inatsisartuni kommunalbestyrelsimilu ilaasortat marloqiusamik
qinigaaffeqartut arlaqarput, tamannalu inatsisinut naapertuuppoq.
Inatsisartunut qinigaaqqammersut 15-it kommunimut qinigassanngortipput;
qulingiluat qinigaapput (Paasissutissat takukkit).
Marlunnik qinigaaffeqarneq akerlerineqangaatsiartoq
Sermitsiaq ukiualuit matuma siorna marloqiusamik qinigaaffeqarneq pillugu
isumasiuivoq, akissutillu 707-iusut, tassa 92 procentit, politikeritta
Inatsisartut kommunalbestyrelsilu ataatsikkut ilaasortaaffigisinnaasanngikkaat
isumaqarput.
62-it, tassa 8 procentit, marloqiusamik qinigaaffeqarneq ajornartorsiutitut
isiginngilaat.
Taamaakkaluartoq partiit tamarmik qinersinernut marlunnut qinigassanngortittorpassuaqartarput,
qinersisartullu qinersivinni taakkunani marluusuni ateq ataaseq
qineqqittarpaat.
Partiit 1970-ikkunni pilersinneqaqqaarmatali marloqiusamik qinigaaffeqarneq
oqallisigineqartarpoq.
Kingullermik Inuit Ataqatigiit Nuummi immikkoortortaqarfiata ajornartorsiut
partiip 2024-mi juulimi Aasianni ataatsimeersuarnerani oqallisigaa, Aasiannilu
immikkoortortaqarfiup marloqiusamik qinigaaffeqartarunnaarnissaq
tapersersorpaa.
Inatsisartuni kommunalbestyrelsinilu ataatsimiinnerit qaleriittarnerat
nalinginnaasorujussuuvoq, tamannalu Kommune Qeqertalimmi kommunalbestyrelsimi
malugisinnaavarput. Inatsisartut kommunalbestyrelsilu aalajangiiffiusunik
suliaqartarput, qinikkallu ataatsimiinnerni kommunimilu suliassani allani
najuunnissaat pisariaqartipparput, Aasianni siulittaasoq Marianne S. Larsen
ataatsimeersuarneq sioqqullugu Sermitsiamut oqarpoq.
Ataatsimeersuarnermi Nuummi immikkoortortaqarfiup siunnersuutaa qinersinissamut
qinigassanngortinnerup tunngaviusumik pisinnaatitaaffiunera pissutigalugu
itigartinneqarpoq. Taamaammat partiip politikkikkut marlunnik ataatsikkut
suliaqarsinnaanermut tunngatillugu inuk nammineq aalajangiisussanngortippaa.
Ataatsimeersuarnermi aamma ilaasortat qinersinernut marlunnut
qinigassanngortittut marloriaammik qinigaaffeqarsinnaanerup nalorninartortai
pillugit qineqqusaartunut unneqqarissuuqqullugit kajumissaarneqarput.
– Nunatsinni politikkimik suliaqarnermi marloriaammik qinigaaffeqartarneq
unitsinniarlugu ilaasortatsinnit saaffigineqartaratta siunnersuuteqarpugut.
Siunnersuutitta itigartinneqarsimanera pakatsissutigaara, nuannaarutigaarali
qinersisartut marloriaammik qinigaaffeqartarneq pillugu siumut
ilisimatinneqartarnerat, Nuummi immikkoortortaqarfimmi siulittaasoq Ludvig
Larsen Sermitsiamut ullumi oqarpoq.
Ludvig Larsen Nuummi Marianne S. Larsenilu Aasianni kommunimut — kommunimullu
qinersinermut taamaallaat - qinigassanngortipput.
Tusaamasaaneq sunniuteqartartoq — ilaannikkut
Partiit tamarmik marlunnik qinigaaffeqarnissaq akuerivaat.
Inuit Ataqatigiinniit Inatsisartunut qinigaaqqammersut Aqqaluaq B. Egede
(267-nit qinerneqartoq) aamma Pipaluk Lynge (61-nit qinerneqartoq)
Kommuneqarfik Sermersuumi qinigassanngortippaat. IA-p illoqarfiit
pingaarnersaata kommuniani pissaaneqartuarnissaminut periarfissaanik
nukittorsaasoqarnissamik siunertaqartumik tamanna pivoq.
Qinigaanngikkaluarlutik IA-mut qinersinernik 328-nik pissarsipput. Inuit
Ataqatigiit Demokraatillu kommunit aaqqissuusseqqinneqarnerata kingorna
suleqatigiittarnerat kommunalbestyrelsimi suli amerlanerussuteqarpoq.
Partiit allat aamma nuna tamakkerlugu politikkilerinermi ilisimaneqarluartut
atorluartarpaat, iluatsitsinerilli assigiinngiiaarput.
Demokraatit siulittaasup tulliata saniatigut aamma naalakkersuisunngortussaq
Nivi Olsen Kommuneqarfik Sermersuumi (qinigaasoq – 157-nit qinerneqartoq)
saniatigut aamma naalakkersuisunngortussaq Peter Borg Kommune Kujallermi
(qinigaanngitsoq – 18-init qinerneqartoq) qinigassanngortippaat.
Atassutip siulittaasuni Aqqalu C. Jerimiassen Avannaata Kommuniani (qinigaasoq
– 267-nit qinerneqartoq) aamma siulittaasup tullia naalakkersuisunngortussaq
Bentiaraq Ottosen (qinigaanngitsoq – 53-init qinerneqartoq) Kommune Kujallermi
qinigassanngortippai.
Naleqqap siulittaasuni Pele Broberg Qeqqata Kommuniani (qinigaasoq – 121-nit
qinerneqartoq) aamma siulittaasup tullia Jens Napãtôk (qinigaasoq – 186-init
qinerneqartoq) Avannaata Kommuniani qinigassanngortippai.
Siumup siulittaasorisimasani Kim Kielsen (qinigaasoq - 139-init qinerneqartoq)
Kommuneqarfik Sermersuumi qinigassanngortippaa.
Qullip siulittaasuni Karl Ingemann (qinigaanngitsoq – aqqaneq-marlunnit
qinerneqartoq) Qeqqata Kommuniani qinigassanngortippaa.
Allaaserisaq Sermitsiami aaqqissuisoqarfiup
naammassinissamut piffissaliussaa sioqqutitsiarlugu allanneqarpoq, tassani
kommunini tamani ilaasortaatitaasut agguataarnerat tamakkiisoq www.valg.gl-imi
suli saqqummiunneqanngilaq, taamaammallu qinersinermi inernerit siulliit
pigineqartut tunngavigalugit allanneqarpoq.
