KOMMUNIMUT QINERSINEQ 2025
Qinersivinnut qinersiartortut inissaqarnerulersinneqartut
Innuttaasut piffissap sivikitsup iluani aappassaat qinersisussanngorput. Nuummi illorsuarmi timersortarfimmi Inatsisartunut qinersisoqarmat inuit tulleriaattut amerlapput, maannalu qinersiartortut inissaqarluaqqulugit aaqqiisoqartoq Nuummi qinersivimmi aqutsisoq oqarpoq.
Qinersivimmi matut ammarnissaat sioqqullugu nakkartitsiviit takutinneqarput.
Assi: Oscar Scott Carl
Nuna tamakkerlugu kommuninut qinersineq marlunngornermi nalunaaqutaq 09.00 aallartipput, kommunalbestyrelsinullu tallimanut ilaasortassanik qinersisoqassaaq.
Illoqarfiit pingaarnersaanni qinersineq aallartimmat Sermitsiap tusagassiortua najuuppoq, Inatsisartunullu qinersinermit sapaatit akunneri pingasut matuma siorna pisumit eqqissisimanarnerusoq nalunaarutigineqarpoq.
Marlunngornermi ullaap tungaani qinersivimmi tusagassiortut sulisullu qinersisartunit amerlanerupput, tamannalu apriilip aqqarnani qinersinermit allaanerulluinnarpoq. Tassanimi Nuummi illorsuaq timersortarfik qinersineq ammarneqarmat inunnik ulikkaavimmat qinersiniat tulleriaapput.
Qinersiviup pisortaa Bea Mølgaard Lennert tamatumuuna qinersisartut inissaqarnerulersimasut Sermitsiamut oqarpoq:
- Qinersinermit kingullermit misilittakkat tunngavigalugit piareersarluarnerusimavugut, qinersisartut qinersiartortussat sapinngisamik inissaqarluartikkumallugit. Qinersivimmik pitsaanerusumik aaqqissuussaqarpugut, tamannalu iluatsipparput. Qinersiartortut tulleriiaaffigisinnaasaat aamma amerlivagut, oqarpoq.
Amerlasuut qinersiartornissaat neriuutigineqarpoq
Inatsisartunut qinersineq soqutigineqarnerusartoq oqarpoq.
- 2022-mi kommunimut Inatsisartunullu qinersineq ataatsikkut ingerlanniaraluarneqarmat taama pisoqaqqinnissaa takorlooruminaappoq. Takusinnaavarpulli qinersisartut ikinnerusut, soorlu qinersineq nalinginnaasoq kommunimulli qinersiartortut ikinnerulaartut, Bea Mølgaard Lennert oqarpoq.
Kommunimut qinersineq 2025
Assi: Oscar Scott Carl
Ullup ingerlanerani qinersiartortut amerlanerulernissaat neriuutigaa:
- Neriuppunga qinersisartut amerlanerusut qinersiartorumaartut. Kommuninut tamat oqartussaaqataanerat tunngavigalugu qinersinermi qinersisartut ulluinnarni inuunerminnut attuumassutillit toqqaannartumik taasiffigisinnaavaat, taamaattumik neriuutigaara ullup ingerlanerani qinersiartortorpassuit takkutissasut, qinersivimmi aqutsisoq oqarpoq.
Borgmesterinngorniunneq pissanganartoq
Inatsisartunut qinersisoqareersoq nuna tamakkerlugu politikkikkut ilaasortat agguataarnerat allanngormat qularnanngitsumik ullumikkut qinersinerup inernera pissanganartorujussuuvoq.
Inatsisartunut qinersisoqarmat nuna tamakkerlugu politikkini allanngortoqarujussuarpoq, taamaattumik ullumi qinersinerup inernera qularnanngitsumik pissanngatigineqassalluni.
Partiit taakku marluk kommunini borgmesteriupput kommunalbestyrelsinilu ilaaasortaqarluarlutik, ullumili qinersisoqarnerani tamanna allanngorsinnaavoq.
Kommunalbestyrelsinut qinersinerup saniatigut aamma nunaqarfinni aqutsisunut ilagiillu sinniisaannut qinersisoqarsinnaavoq.
