Qinigassanngortittoq: Motocrossit atugaalertariaqartut

Motorcykelit 1980-imi atuutilersumik Kalaallit Nunaanut eqquteqqusaajunnaarput, inatsilli taanna ullutsinnut naleqqukkunnaarsimasoq, qinigaaffimmilu tulliuttumi motorcykelit nunatsinni atussallugit tulluuttut eqqunneqarsinnaalertariaqartut.

Inatsisartunut ilaasortaq Upernavimminngaanneersoq Hartmann Heilmann, Naleraq, Inatsisartunut aamma Avannaata Kommuniani kommunalbestyrelsimut qinigassanngorteqqittoq isumaqarpoq.

Taamatullu kissaateqarnera savaatilinnit takornarialerisuniillu taperserneqarpoq.

Inuup inuuneranik naleqartarsimasut

Inatsisartunut ilaasortaasimasup Bjørk Lange Kristensenip paragraf 37 atorlugu 2023-mi Naalakkersuisunut apeqquteqaataanut akissut naapertorlugu, taamanikkut nunatsinni motorcykelit inerteqqutaalernissaat pillugu Kalaallit Nunaannut ministeriunerusimasup inatsisissatut siunnersuutaa, Landsrådiusimasup 1978-imi ukiakkut ataatsimiinnerminni oqaluuseraa, taakkulu siunnersuutip akuersissutigineqarnissaanik innersuussuteqarnerisigut motorcykelit 1980 aallarnerfigalugu nunatsinnut eqquteqqusaajunnaarput.

Motorcykelit inerteqqutaanngikkallarmata sukkanerpaamik tiimimut 40 kilometerit ingerlasoqarsinnaavoq, tamannali malinneqartarsimanngimmat imminut avatangiisinullu navianartorsiortitsisoqartarsimavoq, tamatumalu kingunerisaanik piffissami 1970-imiit 1976-imut motorcykelinik ajutoornerit inuit 29-t inuunerannik naleqarsimasut akissutigineqartumi ilaatigut allassimavoq. Piffissami tassani motorcykelit 70-it tungaanut amerlatigisimapput.

Nunatsinnilu biilit knallertillu atussallugit tulluunnerusut, taamanikkut Landsrådeusimasup nalilersimavaa.

Folketingi akuerseqqaartariaqartoq

Motorcykelinik eqqusseqqusiunnaarsimanerup taamaatinneqarnissaa pillugu Naalakkersuisut akissutaat naapertorlugu Atassut 2011-mi ukiakkut ataatsimiinnermi siunnersuuteqarnikuuvoq, taannalu aallaavigalugu Inatsisinik atuutsitsinermut ataatsimiititaliaq isumaliutissiissummik suliarilluakkamik taamanikkut saqqummiivoq. Inatsimmillu atuukkunnaartitsineq allannguinerluunniit Folketingip akuersissutigeqqaassagaa, kiisalu Naalagaaffiup inatsisaanik aamma Namminersorneq pillugu inatsimmik allannguisariaqarnermik ilaatigut kinguneqassasoq, akissutigineqartumi erserpoq.

Inatsit naleqqukkunnaarsimasoq

Knallertit scooterillu inatsisit naapertorlugit tiimimut 30 kilometerimik sukkatigisumik ingerlasinnaasut kisimik ullumikkut atorneqarsinnaapput. Motorcykelillu eqqartorneqartillugit motorcykelit sukkasuuliat aqqusinikkut sukkaqisumik ingerlasut siulliullugit eqqaaqqaarneqartartut Hartman Heilmann oqarpoq.

- Motorcykelit sukkasuuliat soorlu Harley Davidsonit allallu nunatsinni atorneqartalernissaat uani siullertut pineqanngilaq. Nunatta ilarujussuani aqqusernit pitsaasuunngillat, maannakkullu atussallugit akuerisaasut scooterit aqqulluttumi aputilimmilu atorsinnaanngillat.

- Taamaattumik motorcykelit aqqulluttumi atussallugit tulluussakkat, soorlu motorcrossit, nunatsinnut eqqunneqarsinnaalersuuppata, tamanna nunatta ilarujussuani iluaqutaasinnaagaluarpoq.

- Taamaattumik qinigaaffimmi tulliuttumi motorcykelit taamak ittut nunatsinni atugaalersinnaanissaat sulissutigineqartariaqarpoq, taanna oqarpoq.

Savaatillit savanik katersinermi motocrossit atorluarsinnaagaat, Savaatillt Peqatigiit Suleqatigiissut siulittaasuata tullia Siiku Bjerge oqarpoq, kiisalu takornarialerisut nunap timaanut angallassinermut motorcykelit taamak ittut aamma atorluarsinnaagaat, Ilulissat Excursions ApS-ip pisortaa Jan Cortsen isumaqarpoq.

Facebookimi qupperneq Gør Motorcykler Lovlige i Grønland (motorcykelit nunatsinni inerteqqutaajunnaarlik) 700-t sinnilaarlugit ilaasortaqartoq pilersinneqarnikuuvoq.