Kajumissaarut:
Qinngarsuineq akuerineqarsinnaanngilluinnarpoq
Kinaaneq pissutigalugu taamaaliorfigineqarnerup qanoq annernartiginera aamma assuarineqarnerup ajoqusiisinnaatiginera nunatsinnerpiaq tamatta ilisimasariaqaraluarparput, naalakkersuisoq Naaja H. Nathanielsen (IA) oqarpoq.
- Qinngarsuisumik oqalunneq aamma tassaavoq oqaaseqaatit, aamma digitaliusumik silarsuarmi pisuni, nakuusernissamut kajumissaarutaasut aamma eqimattakkuutaanut aalajangersimasunut nakuusernermik innarliinernillu kinguneqarsinnaasut, Naaja H. Nathanielsen oqarpoq.
Assiliisoq: Leiff Josefsen
Inuit kinguaassiuutitigut pissusilersornerat inuiaassusaallu tunngavigalugu nikanarsarneqartarnerat, soorlu nilliaffigineqartarsimasut allaallu saassunneqarsimasut, pillugu nalunaarusiaq saqqummiunneqaqqammerpoq.
Taamatut suaartaasarneq saassussisarnerlu akuerineqarsinnaanngilluinnartut naalakkersuisoq Naaja H. Nathanielsen (IA) oqarpoq:
- Tamanna akuerineqarsinnaanngilluinnarpoq.
- Kinaaneq pissutigalugu taamaaliorfigineqarnerup qanoq annernartiginera aamma assuarineqarnerup ajoqusiisinnaatiginera nunatsinnerpiaq tamatta ilisimasariaqaraluarparput.
Pissaaneqarusunnermut sakkut
Politikikkuinnaanngitsoq aammali kikkut tamarmik toqqissisimanissaat anguniarlugu inuiaqatigiit akisussaaqataasut Naaja H. Nathanielsen aamma oqarpoq:
- Tamatta, tunuliaquttagut, suiassutsigut, kinguaassiuutitigut eqqarsartariaatsigut, piginnaasagut imaluunniit isummat aalajangiussimasagut apeqqutaatinnagit immikkut tapersiinissatsinnut pisussaaffeqarpugut, taamaalilluni tamatta toqqissisimaneq misiginiassagatsigu
- Tamanna aamma digitaliusumik silarsuarmi atuuppoq, taamaammallu qanigisariinni nakuusertarnerup akiorniarneqarneranik suliaqarnermi, digitaliusumik nakuuserneq, ilaatigut internettikkut attaveqarnermi pimmatiginninnerup aamma qinngarsuisumik oqalunnerup ukkatarineqarnissaa ilaatinneqarpoq, taanna oqarpoq.
Qinngarsuisumik Oqalunneq Akiorniarlugu Iliuuseqarnissamut Naalagaaffiit Peqatigiit Nunat Tamat Akornanni marlunngornermi ullorititaata nalliussineqarnerani taama nalunaaruteqarpoq.
Ullormi tamatumani nunarsuarmi tamarmi qinngarsuinermik oqalunnerup siaruaakkiartornera pillugu ernumassutit ersersinniarneqarput.
- Qinngarsuisumik oqalunneq annersitsiinnartanngilaq. Qinngarsuisumik oqalunneq tassaavoq pissaaneqarusunnermut sakkut, aamma eqqorneqartunut annertuumik kinguneqartitsisinnaasoq.
- Qinngarsuisumik oqalunneq aamma tassaavoq oqaaseqaatit, aamma digitaliusumik silarsuarmi pisuni, nakuusernissamut kajumissaarutaasut aamma eqimattakkuutaanut aalajangersimasunut nakuusernermik innarliinernillu kinguneqarsinnaasut, Naaja H. Nathanielsen oqarpoq.
Immikkoortitsinnginnissamut inatsit juulip aallaqqaataanit atuutilertussaanera Naaja H. Nathanielsen erseqqissarpaa, ullormilu tassani Naligiissitaanissamut aalajangiisartut innuttaasut immikkoortinneqarsimasut saaffigisinnaasaat aamma pilersinneqassaaq.
