Qivioq Løvstrøm Inuit Innarluutillit Oqaaseqartartuattut toqqarneqarpoq

Qivioq Løvstrøm Inuit innarluutillit oqaaseqartartuattut atorfinittussanngortoq, Naalakkersuisut tusagassiuutitigut nalunaarutigaat:

-  Naalakkersuisut Qivioq Løvstrøm Inuit Innarluutillit Oqaaseqartartuattut nutaatut toqqarpaat ukiumiillu nutaamit aallartissalluni. Qivioq siunnersuisoqatigiinni siulittaasuunermini allattoqarfimmik patajaatsumik pilersitsisinnaasimasoq tamatumanilu inuiaqatigiinni inuit pisinnaatitaaffii pillugit paasititsinermik angusaqarluarsimalluni,  Meeqqanut Inuusuttunullu Naalakkersuisoqarfik tusagassiuutitigut nalunaarummi allappoq.

Anja Hynne Nielsenip atorfimmut qinnuteqaqqinniarluni Sermitsiamut oqaatiginikuuaa, Naalakkersuisulli atorfinitseqqinniarlugu aalajangersimanngillat. Sooq atorfinitseqqinneqannginnersoq Naalakkersuisut oqaaseqarfiginngilaat. Anja Hynne Nielsenip atorfimmut isumaqatigiissutaa novembarip naaneranut killeqarpoq. Naalakkersuisulli qujaffigaa:

-  Siullertut Inuit Innarluutillit Oqaaseqartartorisimasaalu suleqatigiissimanitsinnut inuillu innarluutillit pisinnaatitaaffiinut tunngasunik tunniusimaneranut qujaffigerusuppara. Anja Hynne Nielsen siunissamik pitsaanerpaamik kissaappara.

Qivioq Løvstrøm 32-nik ukioqarpoq Inuit Pisinnaatitaaffii pillugit Siunnersuisoqatigiinni siulittaasutut atorfimminngaanneerluni, inuusuttuunermini Siunnersuisoqatigiit aamma suliffigisimavaa.

-  Inuit Innarluutillit nutaatut Oqaaseqartartuat ukiorpassuarnit misilittakkaminit Kalaallit Nunaanni inuttut pisinnaatitaaffinnut institutti pillugu ilisimasaqarluarpoq ineriartornermilu eqeersimaarluni peqataalluarsinnaassalluni. Qivioq ingerlatitseqqittarnermik ilisimasaqarluarmat, inuit pisinnaatitaaffiinut tunngasunik sulinermigut misilittagaqarmat kiisalu suleqateqallaqqillunilu aqutsisuulluarsinnaammat, inunnut innarluutilinnut inuiaqatigiinnullu tamanut nalimik annertuumik tunniussassaqarpoq. Taamaattumik Kalaallit Nunaanni inuit innarluutillit nukittorsarnerannut illersorneqarnerannullu ilapittuutissaqarpoq. Suleqatigiinnissamut qilanaarpunga,  Meeqqanut, Inuusuttunut, Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Aqqaluaq B. Egede oqarpoq.

Misilittagaqarluartoq

Qivioq Løvstrøm Ilisimatusarfimmi Ph.d.-nngorniartuuvoq, ukioq manna nunap inoqqaavisa pisinnaatitaaffii qitiutillugit Fulbright Fellowinngorsimavoq. Qivioq Løvstrøm siornatigut Nunanut allanut Naalakkersuisoqarfimmi AC-fuldmægtigitut sulisimavoq, tassani Asiamut tunngasut, Niuerneq, Silap pissusia, Inuit pisinnaatitaaffii aamma Nunap Inoqqaavisa pisinnaatitaaffii suliassaqarfigisimavai.

Ukiut ingerlanerini Naalagaaffiit Peqatigiinnut nalunaarusioqataasarsimavoq, Kalaallit Nunaannilu Inuit Pisinnaatitaaffii pillugit killiffinnik nalunaarusianut atatillugu Danmarkimi Inuit Pisinnaatitaaffii pillugit Institutti, MIO Tiliorlu suleqatigisarsimavai. 

Qivioq atorfilittatut siunnersuisoqatigiinnilu ilaasortatut aamma NGO’p ilaattut nunarsuaq tamakkerlugu sumiiffinnilu ingerlataqartunik sulinermik aamma misilittagaqarpoq. Suliassaqarfiillu assigiinngitsut akornanni suleqatigiinnerup pingaaruteqassusaa ilisimalluarpaa.

- Inuit Innarluutillit oqaaseqartartuattut atuuffik imaannaanngitsuusoq ilisimavara, tamanna maanna uanga atorfigisussanngorpara. Arnat maligassiuisut tamarmik eqqaamallugit qujamasullungalu pisinnaatitaaffigut illersorlugit suliumaarpunga, Qivioq Løvstrøm oqarpoq.

Qivioq Løvstrøm januaarip aallaqqaataani 2025-mi atorfimmini aallartissaaq. Anja Hynne Nielsen taarserpaa, taanna decembarip aallaqqaataani 2021-mi aallartissimavoq.

Inuit Innarluutillit pillugit Oqaaseqartartoq piffissami ukiunut 3-nut killissaleriikkamik toqqarneqartarpoq.