Qulimiguulimmut annaassiniummut kissartumik ujaasisartunik atortorissaarusiisoqassaaq
Qulimiguulimmut Kalaallit Nunaanni annaassiniartartumut atortorissaarutinik kissartumik ujaasisartuliinissamik isumaqatigiissut ukioq manna atsiorneqassasoq illersornissamut ministeri paasissutissiivoq.
- Maluginiutinik aalajangersimasunik aaqqiinissamik (Forward Looking Infrared sensor) qulimiguulimmut Kalaallit Nunaanni annaassiniarnermi atorneqartartumut suliaq ingerlavoq, Troels Lund Poulsen oqarpoq.
Assi: Thomas Traasdahl/Ritzau Scanpix
DR-ip aallakaatitassiaa De Arktiske
Reddere folketingimut ilaasortamut Asii Chemnitz Narupimut (IA)
eqqarsalersitsivoq.
Kalaallit Nunaanni annaassiniartartut
qulimiguulianni atortorissaarummik FLIR-imik, tassa kissartumik
ujaasissut, soqanngitsoq piviusulersaarummi takuneqarsinnaavoq.
Atortorissaarut FLIR, kissartumik
ujaasissut, silarlutsillugu ujaasinermi iluaqutaalluarsinnaavoq. Aaja
Chemnitzillu paasititsinera aallaavigalugu qulimiguullit Kalaallit
Nunaanni annaassiniarluni atorneqartartut taakkunannga
atortorissaarusersorneqarnissaat politikkikkut ukiut arlallit matuma
aalajangerneqarnikuuvoq.
Politikeri taamaattumik
illersornissamut ministerimut suliaq pillugu apeqquteqarpoq,
taassumalu atortorissaarusersuinissaq pissasoq
paasissutissiissutigaa. Isumaqatigiissut ukioq manna pissasoq
naatsorsuutigineqarpoq:
- Maluginiutinik aalajangersimasunik
aaqqiinissamik (Forward Looking Infrared sensor) qulimiguulinnut
Kalaallit Nunaanni annaassiniarnermi atorneqartartunut suliaq
ingerlavoq. Danmarkimi qulimiguullit annaasiniarluni atorneqartartut
assiginik FLIR-inik ikkussuinissaq sulissutigineqarpoq. Kalaallit
Nunaanni timmisartut annaassiniartartut 2024-mi
isumaqatigiissuteqarfigineqarnissaat naatsorsuutigineqarpoq,
illersornissamut ministeri Troels Lund Poulsen Aaja Chemnitzip
apeqqutaanut allakkatigut akissuteqarluni ilisimatitsivoq.
Ikiueqqaarnissamik piginnaanngorsaanissaq pilersaarutaanngitsoq
Folketingimut ilaasortap ministeri aamma aperaa qulimiguulimmik
annaassiniartartut ikiueqqaarnissamik piginnaanngorsarneqarnissaa
qulakkeerneqassanersoq
Taamaattoqanngitsoq Troels Lund Poulsen akivoq:
- Illersornissaqarfiup ilisimatitsissutigaa qulimiguulimmik
annaassiniartartut ikiueqqaarnissamik piginnaanngorsarneqarnissaat
pillugu massakkut pilersaaruteqartoqanngitsoq. Illersornissaqarfiup
nalunngilaa Air Greenland A/S-ip inuttat ikiuinissanik
ilinniartinneqarsimanerat pitsanngorsarniarlugu suliniuteqartoq,
ministeri allappoq.
Qulimiguulimmi annaasiniummi inuttani minnerpaamik ataaseq
ikiueqqaarnissamik ilinniarsimanissaa Air Greenlandimik
qulimiguulimmik annaassiniarnermik isumaqatigiissummi
piumasarineqartoq Illersornissamut ministerip ilanngullugu
paasissutissiissutigaa.
