Qulleq Inatsisartunut qinigassanngortitsinissaq siunertaralugu atsiornernik katersivoq
Partii pilersinneqaqqammersoq Qulleq Inatsisartunut qinigassanngortinniarluni atsiornernik katersivoq. Partiimi Karl Ingemann siuttoralugu, Henrik Fleischerilu tullersortigalugu nunatta namminiilivinnissaanut anguniagaqarniarlutik atsiornerit 870-it pissarsiariniartussaassavaat.
Foto: Qulleq
Illoqarfimmeeqqammeruit immaqa takusimassavatit inuit pappialamik kuglepennemillu qungujulallutik tigummisut atsiorfigineqarnissartik neriuutigalugu.
Partii pilersinneqaqqammersoq, Qulleq, Inatsisartunut qinersinissamut sassarnissarsinnaajumallutik atsiornernik katersileruttorput.
- Neriuuteqarpugut sapinngisarput tamaat inuit tigulluarumaaraat, qulequtaqarmat Qulleq, nunap inui pillugit politikkikkut
sullissivittut oqaaseqartalerlugu, siulittaasoq Karl Ingemann Sermitsiamut oqarpoq.
Qulleq qulinik anguniagaqarpoq, ilaatigut nunatta naalagaaffinngornissaa tunngaviusumillu inatsiseqarnissaa. Kommunerujussuit nunatsinnut naleqqussarneqassaat, KANUKOKA-llu pilersinneqaqqinnissaa aamma anguniagaasa ilagaat:
- Nammineq nunatta inuit nunatsinnut allagartaqalernissaat, tassa passeqalernissaat, qallunaatut passeqarunnaarlutik angussavarput.
Karl Ingemannip aamma oqaatigaa atsiornerit 870-it januaarip naanissaanut katersorniartussaassallutigit.
Partii Qulleq 2023-imi pilersinneqarpoq, Henrik Fleischer siuttoralugu. Sumiiffinni immikkoortortat arlallit pilersinneqareerput, soorlu Narsami, Qaqortumi, Nuummi, Maniitsumi Sisimiunilu.
Henrik Fleischer maanna siulittaasumut tullersortaavoq.
